Sorkar laipui chuan India leh Myanmar ramri km 1,643-a thui chu hung a tum a, ramri hnaiha free movement regime (FMR) agreement pawh tihtawp a ni thuai dawn tih Union Home Minister Amit Shah chuan a sawi a. Mizoram Chief Minister Lalduhoma chuan sorkar laipui hmalak tumna hi duh lo mah se an tih tlat chuan an tan tihngaihna a awm dawn lo tih a sawi.
India hian Act East Policy a kalpuiah kum 2018 khan FMR a kalpui a, ram pahnih ramri atanga km 16 china chengte chu visa ngai kher lovin an inkalpawh thei a. He inremna hi tihtawp a ni dawn hnai a ni.
“Assam-a ka thiante hnenah hian Narendra Modi-a sorkar hian India-in Myanmar nena inrina a hawn hi Bangladesh nena kan inrina kan hung ang bawka hung turin thu a titlu tawh a ti tih ka puang duh a ni,” tiin Shah hian Inrinnia Guwahati-a Assam Police commando 2,551 zet passing-out parade a hmanpuinaah a sawi.
India leh Bangladesh ramri km 4,096-a thui zingah a tam zawk chu dan lova India-a lut, hmarchhak tana buaina tling an awm loh nan thuai hniha hung (double-fence) a ni.
“Sorkar hian Myanmar nena FMR agreement neih pawh a titawp thuai dawn a ni,” tiin Shah hian a sawi bawk.
Inrinnia union home minister-in ramri hung tur a puan hnu lawk, tlai lama Chief Minister Lalduhoma’n thuthar lakhawmtute a kawmnaah sorkar laipui thil tum chu an duh lo tih a sawi a; mahse, an tihluih tlat chuan dan theihna an nei lo tih a sawi.
Lalduhoma chuan Mizoram leh Myanmar ramri chu British-in an siam a nih thu leh ram pahnihah hian Mizo an cheng ve ve niin a sawi a, inkalpawh theih loh chu an duh lo tih a sawi.
Hetih rual hian sorkar laipuiin ramri hung leh FMR tihtawp a tum tlat a nih7 chuan tih theih an nei lo tih a sawi a. “Kan dang thei lo,” a ti.
Mizote chu Myanmar-a Chin mite nen inzawmna nei an nih thu leh pawl hrang hrangin heng thil pahnih hi an do thu a sawi.
Chief minister hian January chawlhkar hmasa bera Delhi a zin tum pawhin Prime Minister Modi leh Home Minister Shah a kawmnaah heng thil hi sawiin an pahnihin ngenna a siam chu an dodal lo ve ve tih a sawi.
January thla tira Mizoram tlawhtu, Nagaland Deputy Chief Minister Y. Patton pawhin Lalduhoma nena an inkawmnaah Naga-te pawhin ramri hung tumna hi an duh lo tih a lo sawi tawh.
Patton chuan, “Myanmar leh India ramri hung hi keini Naga mipuite tan pawh thil pawm theih loh a ni a. Naga mipui zatve deuhthaw hi Myanmar ramah an cheng a, tuna kan ramri hman mek kâna in leh lo sa, an chenna in pindan thenkhat India lama awma a pindan dang thenkhat Myanmar lama awmte pawh kan nei,” a ti a. Hei vang hian Naga mipuiten ramri hung hi rem an ti thei ngai dawn lo tih sawiin, “In dinhmun leh kan dinhmun hi thuhmun reng a ni,” tiin Lalduhoma hnenah hian a sawi a ni.
Myanmar nena inrina hung tumna hi Manipur erawh chuan a duh a, an state-a buaina awm mek pawh tipunluntu pakhat nia ngaiin ramri kân zung zung theih pawh tihtawp a duh.