Aizawl: Assembly Speaker Lalbiakzama’n National Disaster Management Authority (NDMA) member Krishna S Vatsa chu Zirtawpni khan a pisaah kawmin, Mizorama chhiatrupna a thlen thulha a nghawng tihnep theih dan turte a sawipui.
Speaker Lalbiakzama leh Vatsa te hian chhiatrupna thleng thei laka Mizoram a lo invenlawk theih dan tur bakah, chhiatrupna thlengin nghawng nasa zawk a thlen theihte tihnep a nih theih dan chungchanga thil pawimawh hrang hrangte an sawi dun a ni.
Vatsa chuan National Earthquake Risk Mitigation Project (NERMP), Forest Fire Management Programme (FRMP) leh State Disaster Management Fund (SDMF) atangtein fund thahnem tak pek a inhuam thu Speaker hi hrilhin; hetihrual hian, inrelbawl dan kalphung erawh a duhkhawp loh thu sawiin, insiamrem hmasak ngai ni a a hriat thu a hrilh bawk.
NDMA member Vatsa chuan Mizoram Assembly Spekaer Lalbiakzama’n Mizoram dinhmun a taka hmuhpui tura a sawmna chu, kumin furpui hma ngeia Mizoram tlawha zin a tum thu hrilhin, Mizoram dinhmun dik tak leh Mizoram tana thil tha zawk tur nia a hriatte chu a hmun ngeia en hovam kawhhmuh a inhuam thu a sawi bawk.