Premier League table chung berah Liverpool in hma an hruaina chu point nga an tisang a, second half-ah football hlauhawm khelin Bournemouth an pal darh a, 4-0 in hnehna an chang.
Pathianni zana Premier League inkhelah reds hian Vitality Stadium-ah Cherries an luhchilh a. Storm Isha thlipui in United Kingdom a nuai avangin khua chhe mahse Reds in an mamawh result an sualchhuak.
First half-ah Liverpool in goal hlauhawm an siam tam lova, ball inpek fuh tawk loh a tam.
Second half tan hnu lawkah erawh striker Darwin Nunez-a’n Diogo Jota ball pek chu a khung nghal a. Minute 70-naah Jota in an goal hnihna a khung a. Minute 9 a liam lehin an goal thumna a khung lehnghal a. Huntawp hma in Joe Gomez ball cross atang Uruguay international Nunez-a’n an goal hnuhnung ber a khung.
Jurgen Klopp-a pawlte hian team pathum lakah point nga in hma an hruai a, mahse champion lai Manchester City erawh khelh khatin an khel tlem zawk mek.
Jurgen Klopp chuan, “First half-ah khan a harsat em avangin kan inkhelhdan kha a lungawithlak viau. Football tha erawh kan khel lo. Kha vang khan halftime lai khan inthlahdah loh kha kan infuihna a ni.” a ti a. Reds hian an rinrawl Mohamed Salah chu Africa Cup of Nations a khelh avangin chhawr thei lo mahse goal khungah harsatna an la nei rih lo.