Uddhav Thackeray-a cabinet chuan nimin khan Mumbai khawpuia mall leh thil eina hmunte chu nileng zankhuaa inhawng tawh tura tihna a pawm ta a, he kalphung hi January 27 atanga kalpui tan tur niin a thawh khatna atan mihring chen lohna hmuna dawrte chu tih phawt an ni.
Thil eina hmun inhawng tur zingah hian zu zawrhna hmun – pub, bar leh zu dawrte a tel ve dawn lo va. Bar-te hi zing dar 1.30 thleng hawn theih turin ruahman a ni thung tih tourism minister Aaditya Thackeray chuan state cabinet-in an ruahmanna a pawm hnuah a sawi.
“Nileng zankhuaa dawrte inhawnna tur hi kum 2013 daih tawh khan ruahmanna siam a lo ni tawh a, tunah cabinet chuan phalna a pe ta a ni,” tiin Thackeray chuan a sawi a. Devendra Fadnavis-a sorkar khan a kalpui duh lo niin a sawi bawk.
Minister Thackeray hian cabinet-in nimina thutlukna a siam tak hi dawrte nileng zankhuaa inhawng kher tura tihna dan a nih loh thu sawiin mahni duhthlanna a nih zawk thu a sawi.
“London khawpuia zan lama sum chevel hi £ tld 5 vel zet a ni a, hei hi Mumbai khawpuiah pawh kan tlin ve mai kan beisei a. Kan khawpuiah hian thalai, service sector-a thawk nuai 5 chuang kan nei a, tuna ruahmanna kan kalpui tur hian hna nuai 10 velah a tihpun a beisei,” tiin Thackeray chuan a sawi bawk.
Sorkarin ruahmanna a siamah hian Bandra Kurla Complex leh Nariman Point chu a tel a. Nariman Point leh BKC-a lane khat ve ve chu zankhuaa food truck din phal a ni nghal dawn bawk a. Thackeray chuan ruahmanna thar hian khualzin a hip sawt ang a, hna a siam ang a, economy a tithang sawt dawn niin a sawi bawk.
Hetih rual hian police tan hna a tam phah thei dawn a, Home minister Anil Deshmukh chuan ruahmanna pawm a nih chhan chu hmun thlan bikah chauh kalpui a nih dawn vang tih a sawi.
Sorkar hian dawr neitute chu dan pela che lo turin a vaukhan nghal a, an bawhchhia a nih chuan licence cancel-sak thlenga hrem theih an nih tur thu a sawi.