Tunhnai lawkah kan chief minister thar Lalduhawma chuan zu zawrh chungchangah mipui ngaihdan hrang hrang lak anih tur thu a sawi a. He thu hian bengvartu a ngah hle. Zawrh mai duh angin mi tam takin an ngai zui nghal bawk. Zu chungchangah hian inhnialna tawp thei lo kan nei ani ringawt mai a. He thilah hian kan ram hian thu tawp kan vai a hun ta khawp mai.
Mi ramin zu hi buaipui berah an neih lo a. Inhnial vak vak nan pawh an hmang meuh lo. Khawvela thil awm pakhat ani ve mai a. Kan ramah hian politics khelh nan kan hmang a. Hei hian zu chungchangah sawrkar pawh mumalin a kal tir theih loh phah a. Political party te hi chuan tha an tih reng pawh vote an hmuh theihna tur anih loh chuan tha lo an ti mai a. Thil thaah pawh lehlam pawlin an hlawkpui dawna an hriat chuan tha lo an ti leh mai a. Zu chungchanga ngaihdanah pawh hian sawrkarna chang mektu an nih lai leh opposition party an nih laia an ngaihdan a dang fo. Chuvangin political party te ngaihdan hi lak hleih theih pawh ani meuh lo.
Zu zawrh leh zawrh loha ngaihdan lak turah hian thil harsa tak mai chu a mizote hi pawl anga kan ngaihdan leh mimal anga kan ngaihdan a dang fo thin hi a ni. A mimal anga zawrh mai tha ti si khan pawl ang emaw, kohhran ang emaw a ngaihdan an sawi chuan tha an ti lo leh daih thung thin bawk. Ngaihdan lak aniha thu chiang sawi ngam hi an tlem hle thin a ni.
Mipui ngaihdan hi engah hian nge lak ber tur tih pawh hi hriatthiam a har ta a. A langa kan ngaihdan leh sawichhuah lem loha kan ngaihdan hi a dang tlat thin hi a buaithlak lai chu a ni.
Mi tam takin mumal taka control a zawrh mai hian kan ram a nghawng chhe lo zawk ang a an ti a. Mahse, chu ngaihdan chu kihhran huangah chuan sawi ri ngam an awm mang hauh silo niin a lang. Chuvangin sawrkar hian mipui emaw, mipui aiawh emaw rawn em em hi thil tul ber ani lo mai thei.
Tunlai khawvelah chuan zalen taka ngaihdan kan sawi ngamna ber chu social media te hi niin a lang a. Tun inthlan dawn khan social mediaah zpm an chak hle a. Enchhin tha ti an tam a. Inthlan result ah mipui ngaihdan a lo lang a. Zpm chu hneh takin an sawrkar mai a. Kan ngaihdan hi a hranpa a lak em em loh pawhin kan social media ah hian a chiang viau mai. Chuvangin sawrkar tan tumah han rawn buai em em a ngaiin a lang lo. Ruling party in tha an tih chuan zuar mai sela, tha lo an tih chuan zuar lo mai se. Kan kaldan pangngai hian kal mai ila a fuh ber a rinawm.