Myanmar thlawhtheihna pakhat chu nimin chawhma dar 10:19 vel khan Lengpui Airport-ah a chesual a, nunna chan an awm lo nia hriat a ni.
Thudawnnain a sawi danin thlawhtheihna hi Myanmar sipai leh mipui sipaite inkahna avanga Lawngtlai district-a Myanmar sipai sahimna zawnga Mizoram chhunga tlanchhiate phur tura rawn kal a ni.
Myanmar thlawhtheihna hian Lengpui Airport a rawn tum hnuah terminal thlen hma, airport runway sirah a tlan liam a. He thlawhtheihnaah hian pilot leh thawktu dang mi 14 chuangin, mi pariatin hliam an tuar a, a chuang dang mi paruk chuan hliam na lutuk an nei lo nia hriat a ni a. Hliam tuarte hi Lengpui damdawi in panpui an ni.
He thlawhna hi a che sual a ni tih hriat veleh Lengpui Airport a security duty te chuan chhanchhuah hna an thawk zuiin, hliam tuarte pawh an bawihsawm nghal niin thudawnna chuan a sawi bawk.
Thudawn danin, he thil thleng avang hian Directorate General of Civil Aviation (DGCA) lamin thlawhtheihna chetsual dan an chhui nghal a, hemi vang hian Lengpui Airport flight operation cancel a ni a. Nimin khan khualzin phur thlawhtheihna tum ruk vel rawn tum tura ngaih a ni. He thu buatsaih lai thleng hian vawiin lamah thlawhtheihna rawn tum dan tur ruahmanna an siam dan hriat theih a la ni lo.