Atletico Madrid in La Liga table mawng lama awm Granada lakah striker Alvaro Morata goal khung hmangin 1-0 in hnehna an chang a, palinaah an inhlangkai.
Thawhtanni zana Nuevo Estadio de Los Cármenes a inkhelah hian Diego Simeone pawlten first half-ah goal hlauhawm siam tam lo mahse second half-ah erawh goal khung tumin an khingpuite an nawr na hle a. Minute 55-naah Antoine Griezmann ball cross chu Morata in a tauh lut a. Offside phar nimahsela VAR hmanga endik hnuah goal a pawm a ni.
Midfielder Saul Niguez chuan goal khung belh mahse goal a pawm a ni lo.
Huntawp dawn lamah Atletico defender Jose Gimenez chuan a handball ngei nia a lanlaiin referee in penalty a pe lo va, hei hian sawizui a hlawh hle.
Simeone chuan, “Handball leh Saul-a goalte kha thutlukna harsa a ni a, heng thil hi a thleng ve thin.” a ti.