Disaster Management & Rehabilitation (DM&R) Minister K Sapdanga leh Public Works Department (PWD) Minister Vanlalhlanate chuan nimin zing dar 7 khan leimin avanga Vaivakawn Zohnuai kawng tlabal tlawhin, harsatna dang a thlen tawh loh nana hmalak dan tur leh kawng siam that dan turte an enfiah.
DM&R Minister chuan leimin avanga Vaivakawn Zohnuai peng kawng tlabal thawmthat thuai chu sorkarin a ngaih pawimawh thu a sawi a, mamawhna nasa leh hmalak ran ngai a nih avangin a siamthat nana senso tul angte pawh ruahman a nih tur thu a sawi a, chak zawka a tul angte buaipuia hma la turin Line Department hotute a chah nghal.
Kawng tha leh tlo zawk fur ruahtui tlak hma ngeia peih fel hman a nih theih nana hmalak tulte leh awmze nei zawka tuiluankawr siam dan turte pawh sawiho a ni.
Ruahman dan chuan Vaivakawn-Zohnuai peng lei tlabal hi RCC balcony hmanga siam tum a ni. Hemi atan hian Rs nuai 218 senna tur DPR siam niin, hemi tur hian SASCI sum Rs nuai 60 chu dahfel tawh a ni a, a dang chu fund remchang atanga pawh tum a ni.
Hmalakna hmasa atan tuna leithaw inchhek mek cubic metre 4900 dawn chu thenfai thuai tum a ni. Lei paih dan tur, a paihna tur leh hemi avanga kawng khar lailawk ngai leh bawhzui ngai dangte chu DDMA thutkhawmah ngaihtuah ni se tih a ni.
Vaivakawn Zohnuai peng atanga Ropaiabawk, Chawlhhmun panna kawng bik chu mamawhna a nasat avangin hman lailawk turin LMV chin kal theih nana chei that hmasak niin, he kawng siam thar hi January 19, 2024 khan hawn a lo ni tawh.
Hmalak lehna tura ruahman chu leimin avanga harsatna dang thleng tawh lo tura furpui thlen hma ngeia leithaw chhek khawl paih fai, tui luankawr tha tawk tak leh kawng tha leh tlo tur RCC balcony hmanga siamte a ni.