Sports & Youth Services Minister Lalnghinglova Hmar leh Sports Authority of India (SAI) Director General Sandip Pradhan chu nimin khan New Delhi-ah an inkawm.
Pradhan nena an inkawmnaah Lalnghinglova Hmar chuan sports lama Mizoram hmasawnna tak tak tur chu SAI nena thawh dunnaah thui tak a innghat tih a hrilh a, Mizoram sorkar tharin sports a kalpui tum danah infiammite tihmasawn tur leh sports association-te tichak tura ruahmanna a neihte a sawi.
SAI Director General chuan Mizoram kal tum dan chu SAI din chhan nena thil inhmeh tak a nih thu a sawi a, SAI atanga puihna awm theite an pek ngei tur thu, sports minister a hrilh.
Lalnghinglova chuan, Mizoram chu SAI hnuaiah Northeast Regional Centre, Manipur hnuaia awm a nih thu leh, hei hi Guwahati Regional Training Centre hnuaia sawn a duh thu a sawi a. SAI DG chuan Minister duhdan chu an lo sawiho tur thu Minister a hrilh a. Mizorama SAI Centre tlawh tur leh, Mizorama sports dinhmun hre chiang tura lo zin tura minister sawmna chu chhan ngei a tum thu Pradhan hian a lo hrilh bawk.