Australian Open a final tum hnih khel tawh Daniil Medvedev-a’n a tawnhriat neih that tawh chu hnehna a chanpui a, Polish seeded number 9 Hubert Hurkacz lakah inkhel hmuhnawm takah a chak.
Nilaini a quarter-final inkhelah hian Russian star, seeded number three nihna changtu Medvedev hian 7-6 (7-4) 2-6 6-3 5-7 6-4 in hnehna a chang a. Grand Slam inelnaah quarter-final a luh vawi kua na a ni.
Hurkacz-a’n Grand Slam quarter-final a luh tum hnihna chauhah Medvedev lakah fakawm takin a khel a. Set inlak chhawkin set li na a la a, set hnih ve ve an lak hnuah set hnuhnung berawh Medvedev-a’n hnehna a chang thei hram.
Kum 2021 US Open champion Medvedev hian a vawi hnihna atan Grand Slam champion nih a tum mek a. Naktuk a semi-final ah hian nizan a inkhel Carlos Alcaraz leh Alexander Zverev te pahnih inkara chak zawk a hmachhawn leh ang.
Darkar li dawn inkhela a chak hnuah Medvedev chuan, “Ka chau angreng hle a, tunah tak hi chuan ka taksa hian hahdam a mamawh tak zet.”
“A kheltha tak zet a, kha vang khan ka inkhelah leh ka result-ah ka lung a awi. Hnehna chang tur khan theihtawp chhuah tak tak ka ngai a, ka hmalamah pawh ka result chu engpawh nise ka chhunzawm zel ang.” a ti.