Khawvel hmar lamah thlasik vanglai a nih mek laiin, khawvel chhim lamah chuan nipui vanglai a ni ve mek thung a. Australia-ah pawh nipui ni sa a sa tha khawp mai a, ram sakawr 90 zet chu ram hnuaia an thi chhar a ni.
Ranger-ten heng sa thite hi Northern Territory-a Alice Springs bul, tui awmna thin bulah kar hmasa atang khan an chhar tan a. Ramsa 40 vel thi pawh tun karah an chhar leh tawh a, anniho hi tui tlakchham vang leh ei tur nei loh vanga thi an ni tih finfiah a nitawh a, sakawr la damte pawh an khawsak phung a buai hle tih an sawi.
Ranger-te chuan tun hnaiah an hmuh thin ram sakawrte hi an hmuh ngai loh avangin an zawng ru deuh va, hetih lai hian tualchhung mi pakhat, Ralph Turner chuan sakawr ruang thlalak a thehdarh chu lo hmuin a hmun hi an pan ta a ni.
Rama tla thin sakawrte bakah hian New South Wales-ah pawh khaw lum lutuk avang hian bak an thi teuh tawh a. Khawkhenna state thenkhatah chuan sangha maktaduai tel an thi bawk.
Australia-ah hian kumin nipui hi a na hle a, an ram khaw lum record vawi tam siam thar a ni tawh a. Nimin pawh khan an khawpui lian, Adelaide-ah chuan 46.2°C (115°F) zet niin kum 1939-a he khawpuia khaw lum ber record chu a khum a ni.
Sakawr thihna hmun, Alice Springs-ah pawh hian chawlhkar hnih vel chhung chu 42°C a ni tawh a, kum dang January-a khaw lum lam ni thin aiin 6°C vel zetin a lum niin Australia-a Bureau of Meteorology chuan a tar lang.
Ni tin deuhthaw khaw lum record thar a awm a, chawlhkar hnih vel chhung hian Australia-a khaw lum zual 10 zinga 5 zet chu a lang hman a ni.
Thuneitute pawhin khaw lum leh ni sa lutuk laka mipui an him nan inchhunga awm tam tur leh pawn lama tih ngai chi ti tam lo turin an ti a. A bikin kum upa leh naupangte veng ngun lehzual turin an ti.