INDIA tangrualin buaina an tawk chhunzawm zel a, an hruaitu langsar zinga mi, Bihar Chief Minister Nitish Kumar chuan ro hran a rel leh dawn ta nia sawi a awm a. Lok Sabha inthlan lo awm turah BJP bawk a thawhpui leh dawn niin a lang.
Ni hnih liam taah khan Mamata Banerjee leh Arvind Kejriwal te chuan Bengal leh Punjab-ah Congress thawhpui an tum loh thu an lo puang ve ve tawh.
Kum 72 mi, Kumar-a hi a vawi nga nan a thawhpui a thlakna a ni dawn a. Kum 2013 atang khan NDA leh Mahagathbandhan-ah a kar tawn reng a ni.
A insawn hnuhnung ber chu kum 2022 kha niin a hma kum hnih lawkah Grand Alliance chhuahsanin NDA a zawm a ni.
Kar hmasa lam atang tawh khan Kumar-a hi INDIA a kalsan mai dawn nia ngaihna a awm tan a. Inthlahchhawnga politics khelh tha a tih loh thu pawh a lo sawi tawh.
Nilaini maiah pawh khan Congress-in Bharat Jodo Yatra a kalpui meka tel ve tura an sawmna chu a lo chhang duh lo tawh bawk.
Kumar-a hian INDIA-a tangrualte inthlang tura an inbuatsaih dan a duhkhawp lo va, prime minister atana vawrh chhuah an tum nia sawi hial pawh ni mah se an hmalak dan a duhkhawp lo.
Bial inchan sem dan turah pawh an thu a muang lutuk chu a lungawi zo lo nia ngaih a ni bawk.