Chinese khawpui pakhat, Xinyu-a bazar chhawng hnuai ber atanga kangmei chhuak tan avangin mi 39 vel an thi a, mi pakuain hliam an tuar bawk.
Sorkar chanchinbu chuan Jiangxi province-a chhiatna thleng hi an rama Nilaini chawhnuah a nih thu an tar lang.
Sorkar hnuaia mi, Global Times-in video a tihchhuahah chuan building atang hian meikhu dum chhah tak a chhuak nguah nguah a, mi thenkhat chu tukverh atangin an zuang chhuak hlawm tih a lang.
President Xi Jinping chuan chhui turin a ti nghal a. An rama hetiang thil a thleng thin chu ‘a tihtawp dan’ ngaihtuah chhuah ngei a duh bawk.
Nilainia thil thlen hma lawk hian an ram laili, Henan province-ah sikul dormitory kangah naupang 13 an lo thi tawh bawk a. A hnuah thawktu mi pasarih man an ni.
November khan hgmar lam, Shanxi province-a lungalhthei company office pisa kangah mi 26 an lo thi tawh bawk.
Hemi hma thlaah hian hmarthlang lama barbecue restaurant-a thil puakah mi 31 an thi bawk a, thuneitute chuan ram pumah hnathawhna hmuna himna kalpui an intiam nghal phah.
Nikum April khan Beijing-a damdawi in kangah mi 29 thiin mi tam tak tukverhah him tumin an lo zuang chhuak tawh bawk.