Aizawl: ZPM kaihhruai sorkarin a din thar leh, State Boundary Committee chu nimin khan a tum khatna atan Forensic Science Laboratory Conference Hall-ah an thukhawm a, sorkar hmasa huna state pahnih sorkar indawrna kal tluang lai chu thar thawh tura hmalak an rel.
He thutkhawm hi Boundary Committee Chairman K. Sapdanga’n a kaihruai a, sorkar hmasa hun tawp lama Mizoram sorkar leh Assam sorkar indawrna kal tluang lai, Mizoram inthlanpui neih dawn vanga chawlh lailawk chu tharthawh tura hmalak tha an ti a, hei bakah hian ramri chungchanga ngaihdan hrang hrang awmte an sawiho a, hun remchang hmasa berah thutkhawm leh nise an ti.
Thutkhawma tel pawl leh party hrang hrang aiawhte chuan ramri buaina chinfel a nih a, inremna neih thuai an duh tawh thu an sawi hlawm a ni.
Thutkhawm kaihruaitu, K Sapdanga chuan ramri buai hnua committee din chawpa thutkhawm chuk chuk aiin, a buai hmaa a chinfel dan tur lo rel lawk chu sorkar duh dan a nih thu a sawi a, ramri him tak, mipuite thlamuang taka an khawsak theihna tur nawr chhuah chu an thupui ber a nih thu sawiin, thenawm state-te nena an lungrual tlanna tur an zawn a pawimawh thu a sawi bakah sorkar hmasa hmalaknate chu zahawm a tih thu leh an ngai pawimawh hle tih a sawi bawk.
State Boundary Committee Member Secretary H Lalengmawia’n a tar lan danin Mizoram leh Assam inkar ramri buai chungchang hi sorkar angin ngaihtuah ho ni fo mah se a ngaihtuah tur bik committee chu kum 2021 khan official taka din a ni a, ramri buai ching felna turin kawng hrang hranga hma an lak thu leh tum nga an thutkhawm thu a sawi a, sorkar tharin committee hi a rawn din thar leh ta tih leh tun tum hi sorkar thar a pian hnu a thutkhawm vawi khatna a nih thu a sawi.