Aizawl: MZP chuan thuchhuah siamin, Siaha ECM Vaih-a cheng Zawasa tual thihna hi pawi an tih thu sawiin, pawi khawih naa mawhphurtute chu na taka an chungah hremna lekkawh turin thuneitute an ngen.
An thuchhuahah MZP chuan, January 20, 2024-a Siaha-a pawi khawihnaa inhnamhnawih te hi Rakhine (Arakan) lam mi, Zohnahthlak raltlante nen inzawmna neilo nia an hriat thu an tar lang a. Arakan Army (AA) nena inkungkaihna nei nia hriat an nih thu leh Lawngtlai refugee camp-ah pawh an awm lo va, chakkhai lam tura zin veivak mai an nia hriat an nih avangin, he thil thleng avang hian an taksa himna zawnga Mizoram a lo tlan, mipui, nunau pawi sawilo harsa tak takte hmer tel lo turin Mizoram mipuite an ngen.
“Mizo mipuiten duat leh hmangaih taka kan unau raltlante kan enkawl mek laia, hetiang pawi khawihna lo thleng hi MZP chuan pawi a ti takzet a. Chutih laiin, Zofa pawh ni lo Rakhine (Arakan Army nia sawi bawk) te avanga kan unaute lakah kan thinrim hrikthlak hi MZP chuan a hlau hle a. Kan unau raltlante pawh fimkhur nana lo hmang turin kan ngen nghal a ni,” MZP thuchhuah chuan a ti bawk.