Aizawl: Network for Unity Association (NUA) chuan thuchhuah siamin, January 25, 2024-a Siaha-a auto rickshaw driver KL Zoasha thah a ni pawi an tih thu tar langin, mipuite hriatthiamna an ngen a, ‘Tualthattute khan Arakan mi an ni,’ an ti.
NUA thuchhuah chuan, “Tualthattute hi Arakan Army (AA) nena inkungkaihna nei nia hriat an ni a. Lawngtlai Refugee Camp-a awm an ni lo. January 20, 2024 khan an bike 125 KENBO chhia chu refugee camp-ah a part a awm avangin rawn lei tuma lo lut an ni,” tiin, pawikhawihtute nia rinte chu an vaiin Arakan mi an nih thu te, kum tling lote an nih avangin an hming an tar lan loh thu te tar langin, Myanmar raltlante thil tih anga thu thang awm chu pawi an tih thu an tar lang bawk.
NUA chuan Myanmar raltlante theihtawpa tanpui a chhawmdawltu pawl MZP, MSU te, NGOs (YMA, YLA, MTP, ZoRO, MHIP etc.) te bakah Mizoram mipui zawng zawng chungah lawmthu sawiin, heng mi sualte pawikhawihna avang hian tlanchhiat leh chuanna tur nei tawh lo refugee-te tan thil duhawm lo zawk a thlen loh nan Mizoram mipuite hriatthiamna leh khawngaihna an ngen a ni.