- Lallunghnema, Charity Lodge
Chhuak hmasaah khan Mission Veng nu pakhat huaisen tak thil tawn ka rawn tichhuak a. Kha thil thlengah khan Bus Conductor chu hren a niin M V Act hmanga Rs.500 chawitir a nih thu ka han sawi chhuak duh a ni. He Consumer Hero hian a thin a dam tâk thu a sawi chhuak nghe nghe a ni.
Hetiang ang thil thleng hi Mizoramah chuan ka la hre ngai lova. A lo thleng tawh thin pawh a ni mai thei. Mahse, mi engemaw zat ka zawh hian sawi tur an hre mai si lova. Chuvangin hetianga Bus Fare dik lo taka inlaksak avanga District Transport Office (DTO) hma lakna angi hi a vawi khatna a nih ka ring ta deuh a ni. Huaisen taka Dan an lek kawh avang hian Transport Department hi an chhuanawm hle a, District Transpirt Officer pawh an fakawm hle bawk a ni.
Mizo hmeichhiate hi an duai lo hle a, tun hunah hian mipa aiin an chhel zâwk ta ni te pawhin sawi a ni thin. Mizo hmeichhe zingah hian entawn tlâk huaisen tak tak chanchin kan la hre chho zel dâwn pawh a ni ang e. He Mizo nu hi chawimawi kan duh a, chawimawi dan erawh Centre For Consumer Education-in a ngaihtuah turah ngai ila.
Eng pawh nise, kan dikna leh chanvo hi kan humhalh ngei tur a ni. Mi zawng zawng tan a ni.I tan pawh a ni e.
Hei hi lo ngaithla teh! Deficiency in Service avangin vai rama hotel pakhat chu Rs 25000 chawitir a nih thu CAG International-ah tarlan a ni a. Customer, G.Ram Chander, chuan Oyo Hotel booking a tih zawhin ngaih tha takin a awm ve mai a. Mahse hriattir lawkna engmah awm miah lovin Oyo Hotel neitute chuan an lo cancelled – sak ringawt mai a. Harsatna na men lo a tawh phah a ni. He Vai pa lungawi lo hian District Consumer Disputes Redressal Commission II hmâah he Hotel hi a khing ta a ni. Consumer Protection Act, 2019 kalh a thil tih a niin ‘Deficiency in Service’ an ni ngei tih sawiin he Hotel hi thiam loh a chantir ta a ni.
Hei pawh,
Toilet bâl lutuk thu: Hei hi thil theng zen zen lo a ni. Tui hman tur awm lo toilet an pêk avangin Delhi District Consumer Commission chuan Indian Railway chu Rs.30000 zet mai a chawitir tih Times of India chuan 21 Jan. 2024 chhuakah a tarlang ve bawk a ni. Heta complainant hian Delhi-Indore reserved ticket 3 AC ticket a la a. He AC-ah hian Toilet changkang tak a awm tur a ni a. Complainant chu Toilet a, a va luh chuan, toilet chu bawlhhlawhin a khat vek a. Railway hotute hnenah chuan complaint a thlehlut ta a. Mahse, a complaint hian awmzia a neih loh avangin Consumer Commission hnênah a thlen leh ta a. Tichuan, Indian Railway chu hrem a ni tâin pawisa tam tham tak an chawi ta a ni.
Hei hi hre rawh:
Dawrkai vengva chuan –
Maximum Retailed Price a ngai pawimawh a,
Buk tling a ngai thu tak thin.
Bungraw chhia a zuar ngai lova,
Bungraw thianghlim a zuar thin.
Bungraw tha chauh a hralh thin
Eitlak, in tlâk, hman tlâk leh hrisel chauh
A hralh chhuak thin.
Dawrkai vengva chuan –
Consumer-te a do ngai lova,
A chapo khum ngai lova,
Hawihhawm takin a lo chhâng thin.
Customer-te duh a ngaihtuahsak thin a,
Consumer-te chu a bei lêt ngai hek lo.
Consumer-te chu an lal a ni tih a hria a,
An thu hnuaiah a kun thin.
Consumer veng va,
Consumer fing
Nih i duh chuan
Huaisen la, duap kâi reng reng suh.
- I mamawh hunah hei hi pan na châng hre rawh:
Centre For Consumer Education, Registration Number: 1610 of 22.6.2023
MualVengchung, Republic, Aizawl, Mizoram.