African-ten an chin thin, hmeichhia, an hnute thang chho zel tur dan nana lung sa hmanga an hnute an nawhsak thin (ironing a girl’s chest with a hot stone) an tih chu tun lai hian ram changkang, UK-ah pawh hmeichhe naupang, an duh loh mipate mit an lak hma loh nan te, mipat hmeichhiatna kawnga an him zawk nan te leh pawngsual pawh an tawh mai loh nan an ti ve thin nia hriat a ni.
Guardian chanchinbuin a tar lan dan chuan London, Yorkshire, Essex leh West Midlands-ah hetianga hmeichhe naupang, an tleirawl chhuah hma deuhva an hnute thang tur tihmuan nana African ram hrang hranga an chin ang chu tih a nih thu an dawng a. Hetianga tih hi a na a, mi pianphung khawihna leh tihdan mawlmang a ni bawk.
UN chuan hetianga hmeichhe hnute nawhsak hi khawvela a ruka hmeichhia-mipa inthliarna lam hawia thil sual tih thin panga zinga pakhatah a chhiar a ni.
Naupangte tihsaktu hi an nute an ni deuh ber thin a, an fate chu an puitlin hmain, an duh loh mi mipain an lo ita an ngaihzawn mai leh an him zawkna tur niin an ngai a. Hetih lam hian damdawi thiam (medical expert) leh hetianga an tihsak tawhte chuan ‘child abuse’ tiin an sawi ve thung a, an rilru leh taksa sawisakna, ser leh natna tha lo te, nau hnute pek leh hnute cancer thlenga harsatna thlen thei niin an ngai ve thung.
Diaspora group pakhat, Came Women & Girls Development Organisation (Cawogido)-a an hotu, Margaret Nyuydzewira chuan hetiang thilah hian UK-a hmeichhia leh hmeichhe naupang 1,000 vel chu an kawm tawh thu leh mumal taka zirna leh data lakkhawm an nei lo tih a sawi a. British-Somali anti-FGM campaigner leh psychotherapist Leyla Hussein erawh chuan London hmar lama a clinic-ah breast-ironing an tihsak mi 5 a buaipui tawh tih a sawi ve thung.
Police chuan UK-ah breast-ironing chungchang thubuai an la nei lo tih an sawi a, rinhlelh erawh an awm tih an sawi.