Manchester City in huntawp dawn lamah Nathan Ake goal khung chu hnehna an chanpui a. Tottenham Hotspur Stadium-ah vawi ruk an inkhelhnaah an chak hmasak ber ni turin 1-0 in an hneh.
Zirtawpni zanlaiah FA Cup fourth round inkhelah hian City in mikhual team ni chungin goal khungna remchang vawi engemaw zat an hloh avangin replay khelh an ngai mai dawn niin a lang hman.
Mahse minute 88-naah Kevin de Bruyne corner vawrh luh chu Spurs keeper Guglielmo Vicario chuan Ruben Dias-a laka a ven tum chu a venghim thei lova, Ake-a’n remchangah la in goal a khung.
Spurs in goal ven an dah pawimawh a, City lakah goal hlauhawm an ngah lo. Lehlamah Vicario-a’n Bernardo Silva goal khung tur a dan bakah rawlthar forward Oscar Bobb goal khung pawm loh a ni bawk.
FA Cup fourth round inkhel dangah Brighton & Hove Albion tan striker Joao Pedro chuan hattrick a siam a. Facundo Buonanotte leh Danny Welbeck ten goal khungin 5-2 in Sheffield United an hneh.
Craven Cottage-ah Newcastle United in Sean Longstaff leh Dan Burn te goal khung hmangin 2-0 in Fulham an hneh a, Luton Town in 2-1 in Everton mualah hnehna an chang ve bawk.