Ayrna Sabalenka chuan kumin Australian Open hmeichhe singles inelnaah champion ni tura mi tam takin an rin fur nachhan chiang takin a lantir a. A hma a ding Zheng Qinwen lakah a thahrui ngah chhawrin hneh takin final-ah a chak.
Belarusian player, seeded number two hauhtu Sabalenka hian 6-3 6-2 in a khingpui hi a hneh a. A Grand Slam title vawi hnihna la ni Australian Open-ah a kum zawnin a champion a ni mai lova, tun tournament-ah hian set hloh miah lovin a champion.
A khingpui seeded number 12 Zheng hian tantu ngah hle mahse Sabalenka in final boruak sangah thiam tak leh nghet takin a hmachhawn a, set hmasa zawk atang Zheng hi thununin a khingpui hian a nawr buai hman tak tak lo.
Kum 2013 a a hnampui Victoria Azarenka hnua Australian Open hmeichhe inelna a champion zawn leh thei hmasa ber a ni.
“Ka tan kar hnih chhung hun duhawm tak a ni a, he trophy han dawn leh hi ka ngaihtuahnaah a awm pha ngai lo.” tiin Sabalenka chuan a sawi a. “Hnehna ropui hi tlawmna na tak tak tel lo chuan a thleng thei dawn lo. Chuvangin hnehna chang tura kan beihna kawngah kan inbuatsaihna leh kan kawng zawh kan ring tawk tur a ni.” tiin a sawi.
Kum 25 mi Sabalenka hi theihna nei sang nimahsela chetsual nei leh thin a sawi a ni fo.
Mahse kum 2023 season atang a inkhelhdan a thlak bakah a inbuatsaihna a thlak danglam a. Nikum khan world number one a inhlangkaiin Grand Slam inelna a che tha tluang thei ber zingah a tel thei bawk a ni.