Aizawl: Agriculture Department hming chu Agriculture & Farmers’ Welfare Department tia thlak tuma hma lak mek a nih thu Agriculture Minister PC Vanlalruata’n a sawi.
He thu hi nimina Thingdawl Agriculture Farm, Krishi Vigyan Kendra (KVK) Kolasib hmun leh District Agriculture Office te a tlawhnaah a sawi a, “Kut hna thawktute hamthatna chu sawrkarin a ngaih pawimawh ber pakhat a nih dawn avangin Agriculture & Farmers’ Welfare Department tia thlak tuma hma lak mek a ni,” a ti.
Kuthnathawktute chu an thlai tharte hralhna tur market ngaihtuahsak an ni dawn a, kum tharah market eng emaw zat puan belh tum a nih thu sawiin, thil thar lei tur zingah buh lei tel tuma hma lak a nih tur thute, Mizorama leilet leh huan ram neitu zawng zawng khawl hmanga chhinchhiah (digitalise) tum a nih thu a sawi.
Agriculture minister chuan Kolasib KVK ram mi mal tana sah thlak tuma hma lakna chungchangah DC atangin hma la chhunzawm lo turin stay order chhuah a nih tawh thu sawiin, kut hnathawh thil chawi san a nih theih nan leh sorkar atanga hmasawnna tura hma lakna atan sorkar ram awm sa chu roh a tul avangin ram sah thlak chu phal a ni dawn lo va, ram pek tuma hma lakna awm sa pawh sut vek a ni dawn tih a sawi a; chutih rual chuan chenna in leh lo nei lote chu thlaphang lo tura chahin, an dinhmun chu sawrkarin a ngaihtuah tur thu a sawi a ni.
PC Vanlalruata hian Thingdawl Agriculture Farm-a hna thawh mek pahnih – NABARD RIDF sum hmanga Seed Processing & Seed Storage Unit sak mek leh Solar Powered Cold Storage for Potato Seed sak mek te chu a hmunah tlawhin a enfiah a ni.