Aizawl: Social Welfare department huaihawtin nimin khan kohhran pawl hrang hranga hmeichhe hruaitute leh MHIP general heaquarters hruaitute chuan kohhran leh inchhungkhur theuha ruihhlo dona kawnga hmalak dan tur leh enkawl dan tur zirhona leh inrawnkhawmna an nei.
Aijal Club-a inrawnkhawmna neih hi Social Welfare Minister Lalrinpuii’n a hmanpui a, khawthlang nun nasa taka ti buaitu ruihhlo do hna chu tha thlah loa ngawrh taka thawh zel a tul thu sawiin, Sorkar pawhin ruihhlo do a ngai pawimawh hle tih a sawi a. Khawtlang nun siam that kawnga hmeichhiate an pawimawh thu te, ruihhlo do kawngah pawh nasa takin sul an sut kuak theih tur thu a sawi.
Naupang leh thalai zawkte ruihhlo laka venhimna kawnga zirtir turin chhungpui nuten mawhphurhna sang tak an neih thu sawiin, ruihhlo ti mekte chhanchhuahna kawngah pawh thahnemngai taka lo pen chhuak zel turin kal khawm te a sawm a ni.
Inrawnkhawm hi Social Welfare & Tribal Affairs, Women & Child Development Department Director Dr. Lalhriatzuali Ralte chuan a kaihruai a, kum 2022-a Mizorama zirna in an zirchian dan tarlan niin, school 122-a kum 10 -17 inkar zirlai 10,733 zirchianna ah ruihtheihthil eng chi pawh vawi khat tal ti tawh an awm em tih zawhna chhanna atanga a lan danah high school leh higher secondary school zirlai aiin middle school kal zingah ti an tam zawk.
He zirchianna atang hian rilru hriselna leh chhungkaw khur boruak leh zu/ruihhlo inkaihhnawihna te, naupang ruihtheihthil khawih te hian puitling ruihtheihthil khawih ang tho an hmang zia te a tilang a ni.
He inrawnkhawmna ah hian Central Kohhran Hmeichhe Hruaitute (Mizoram Synod) Mizoram Baptist Kohhran Hmeichhe Pawl (MBKHP), Territorial President of Women Ministry (Salvation Army), Diocese Catholic Hmeichhe Pawl, General Ladies Auxiliary Department, North-East India (UPC), General Ladies Auxiliary Department, Mizoram (UPC), Administrative Secretary, Lairam Isua Krista Baptist Kohhran Hmeichhe Pawl, Women Ministries Mizo Conference of Seventh Day Adventist, Evangelical Church of Maraland Krizypa No Py (KNP) MHIP leh MCHP General Headquarters atangin Office Bearer leh aiawh 45 vel an kal a ni.