Delhi khaw vawt taka intihlum nana an ina lungalhthei an chhem khu an hip luh nasat lutuk avanga thawchhamin naupang kum hnih mi leh a nu an thi a, an chhungte dang pathum pawh damdawi inah dah an ni.
He chhiatna hi Inrinni zana Delhi chhim lam, Maidan Garhi-a an in luaha thleng kha niin police officer Ankit Chauhan chuan a sawi.
Dinesh-a leh a nupui kum 23 mi, Anjali hian fapa kum ruk mi, Devansh leh kum hnih mi, Shambhu leh fanu kum li mi, Devasi an nei a, mei chhem hian an mu a ni.
Dinesh-a hi Asola-ah farmhouse-ah a thawk a. Khawpuia cheng mi dang tam takte ang bawkin intihlum nan room heater aia tlawm zawk, lungalhthei an hmang a. Thli vawt a luh loh nan tukverh leh kawngka an khar bawk.
Zan tlai tawh takah thawk harsa an tih avangin an nupa hian an tho va. Safdarjung Hospital pan nghal mah se Anjali leh an fa naupang ber chu an chhan hman ta lo va. Dinesh-a leh an fate pahnih pawh enkawl zui an ngai ta a ni.
Lungalhthei hal hian carbon monoxide a insiam nasa thin a, hip luh tam chuan nikhawhriat loh, tisa tihchhiat leh thihna thlengin a thlen thei.
Kum tin thlasik vanglai hian India hmar lamah hian boruak chhuahna awm lova inkhar phui chunga lungalhthei hal ai avangin mi tam tak thi an awm ziah thin.
Chawlhkar hnih liam ta maiah pawh khan Delhi-a Dwarka-ah an lungalhthei ai laiin parda a man kai khu nasa avangin nupa an lo thi tawh a. An fa thla hnih mi erawh an chhan thei thung.