Mizoramah Right to Information (RTI) hman tan kum 2006 atanga tun thlengin RTI Act hmanga zawhna lut chu 20,000 chuang a ni tawh a, RTI zawhna chhang tha duh lo SPIO pathum hrem an ni tawh.
Chief Information Commissioner (CIC) John Neihlaia’n nimin khan a office-ah MJA member-te kawmin, Mizoram Information Commission (MIC) din tirh 2006 atanga January 29, 2024 thlenga RTI hmanga zawhna lut chu manual-in 18,985 leh online hmangin 8,137 a lut tawh tih sawiin, zawhna chhan loh leh chhan that loh avangin second appeal 136 leh complaint 157 a lut tawh.
A sawi zel danin RTI application lut zawng zawng atanga chhutin zualkona leh vuivaina lut chu za zela pahnih chauh a ni a, SPIO leh DDA ten hna an thawk tha thawkhat viau tih a sawi rualin an hna thawk tha duh lo SPIO pathum chu dan hnuaiah hremin sum chawitir an awm.
John Neihlaia chuan village council leh local council hnathawh dan chungchangte zawh chhuah zung zung a nih theih nan VC leh LC te chu nikum khan public authority-ah puan an ni a, chairman leh president zawng zawngte chu SPIO-ah ruat an ni tih a sawi a, hei hi mipuiin an hmang tangkai ngei an duh tih a sawi.
RTI Act 2005 Section 4(1)(B) zawm tha lo sorkar department-te chu koin an tih turte hrilh fiah an nih tawh thu a sawi bawk a, he dan hnuaiah department-te hian mipui hriat tur tul nia langte chu an website-ah an dah emaw, chanchinbu hmangtein emaw an puang zar tur a nih thu te, chanchinbu mite chu department hrang hrangte an website-te lo thlithlaipui turin a sawm a ni.
MIC hi June 26, 2006 khan din tan a ni a, CIC panga leh Information Commissioner panga ruat an ni tawh a, tunah hian CIC chu John Neihlaia a ni a, information officer chu Mangjangam Touthang a ni a, hnathawktu hi mi 28 an awm mek a ni.