AZL: Thawhlehni zing dar 7:45 khan Aizawl New Market Sumo dinna atangin CYMA Kumpuan Sub-Committee leh Excise & Narcotics Department tangdunin ruihhlo dap beihpui thlakin, khawchhak atanga bungraw phurh zing atangin Heroin No. 4 hawng 95 (1.062kg) an man.
Ruihhlo dap beihpui thlah zawhah thu sawiin Prof. Lalnuntluanga, CYMA Vice President & Chairman Kumpuan Committee chuan, ruihhlo dona kawngah sorkar, kohhran, tlawmngai pawlte leh Mizo mipuite thawhho a tul tak zet tih sawi a. Ram hmelma lian tak pakhat, thalai nunna tam tak suat a, chhungkuaa buaina thlentu leh tlakranna thlen tu ruihhlo laka him a nih theihnan leh hlawhtling taka do anih theihnan thahnemngaih chhuah turin Mizo mipuite a sawm.
CYMA-in ram leh hnam a him theihnan kawng hrang hranga hmalaknate tawiawm a, lo tanpui thin turin Mizo mipuite a chah bawk.
CYMA Vice President chuan, Sub-headquarters/Group/Branch YMA te pawh tha thlah lo a kumpuan hlawhtlinna atana hmalakna chhunzawm zel turin a sawm a, sorkar hnuaia thawktu dan leh thupek kengkawhtute, Police te, Excise & Narcotics Dept, Customs Dept., kohhran leh tlawmngai pawl dangte nen thu khat vuaa thawhhona kalpui zel turin a ngen bawk a ni.