Aizawl: Mizoramah party pathum kalphung a awm tak avangin duhthlan tur an ngah tawh avangin mipui thikthu a chhiat tawh thu sawiin minister hlui, Zodintluanga Ralte chuan, “ZPM hi kum nga bak an sorkar lo vang,” a ti.
Saitual, Khawzawl leh Champhai tlangdunga Congress party hruaitute nen an inkawmnaah nimin khan he thu hi sawiin, Zodintluanga chuan, “ZPM hian an sorkar tirh phat atangin an key an la sang em em a, an intiam nasat em avangin mipui thikthu a chhe hle dawn a, thutiam hlen theih loh tur tam tak an neih avangin kum nga bak an sorkar dawn lo,” a ti.
Zodintluanga Ralte chuan kum nga hnuah chuan Mizoram mipuiin Congress ah bak rinna an nghat leh dawn tih sawiin, “Chumi tur chuan Congress party mipuite leh a hminga hruaitute’n ngaihtuahna thar leh fim zawk kan hman a ngai,” tiin, khawvel changkang leh ngaihtuahna thar zawk lo chhuak mila Mizoram hmasawnna an kalpui theih dan tur an ngaihtuah a tul thu a sawi.
MNF party khan sum chakna hmanga sorkar leh ngei tuma nasa taka an bei chung khan MLA 10 an nei tawk tih sawiin Zodintluanga Ralte chuan, “ZPM party in an tlinpui kumah MLA 27 an rawn nei thei tawk a. An sorkar tan atangin a ki an la sang lutuk a, an tawng an umpha lo mek a ni. Restricted tender hmanga hna pek hahipa sawiseltute chuan tun hnai maiah tender pawh chhuah loin hna tam tak an sem mek a ni,” tia sawiin, ZPM kalphung thar hi mipuiin a nihna tak an hmu thuai dawn tih a sawi bawk.
Kum nga chhunga eng chhit man tihsan loh te, kum nga chhunga kawlphetha pe chhuak thei tura luipui panga khuah an tum thu an sawite Mizoram mipuiten an la hrereng a, an lo chik hle dawn a ni, tiin Zodintluanga Ralte chuan ZPM intiamkamna chungchang a sawi a. “Mizorama chief minister kan neih tawh zinga adviser ngah ber chief minister chu ZPM chief minister a ni,” a ti bawk.