Kar kalta khan khawchhak lam atanga lo lut ni ngeia hriat misual thenkhat in mizoram chhim lam Siaha district ah pawi khawihin rapthlak takin auto driver pakhat an that a. Hemi lo pawh hi khawchhak lam atanga lo lutte pawikhawihna lian tham a thleng zeuh zeuh tawh bawk. He thil thleng chungchangah hian Aizawl City College Joint Student Union (ACCJSU) te chuan thuchhuah siamin khawchhak lam atanga lo lutte vauna thu na tak an chhuah a. Ngaihtuahna fim nen lo chuan an thuchhuah hi thil ni awm tak pawh a ni.
Amaherawh chu an thuchhuahah hian khawchhak lam unaute chungchangah illegal immigrant tih an hmang chuan mizo hnam insuihkhawm lehna duhtute rilru a ti na hle. Mizorama pawl hrang hrang political party, NGO leh mimal ang pawhin kan unaute hi illegal immigrant ti hian kan ko ngai lo a. Illegal immigrant chu dan lova ramdang atanga lo lut kan tihna ani ber a. India danah chuan illegal immigrant chu an ni ngei mai. Mahse, mizote nihna dik tak hrechiang a, he hnam hi engtia hetia lo awm ta nge kan nih tih ngaihven ve tu chuan Bangladesh atangin an ni emaw, Myanmar atangin an ni emaw, harsatna avanga unaute bela lo lut hi illegal immigrant kan ti phal ngai lo a ni. Phai vai ho tan chuan illegal immigrant tih tur chu an ni ngei ang. Mahse, mizopa thinlungah chuan kan ram bung thenkhata cheng ten an sawrkar in mipui a awp dan avanga harsatna tawka, an sahimna zawnga helama lokal rih mai an ni tih chu kan pawm dan a ni. Engtikniah emaw chuan unaute hi kan la insuihkhawm leh ngei ang tih pawh hi mizote hmathlir mek a ni. Khawiah pawh hian misual, pawi khawih ching leh mi nunrawngte hi an awm a. Chung misualte thil tih leh pawi khawih avanga misual ni ve lo te thlenga mawh phurh tir a, an zavaia thiam loh chantir hi rorelna fing ani ngai lova. Ngaihtuahna chiang lo thutlukna ani fo bawk.
Mizote hi tutenge kan nih tih hrechiang lovin British ho khan min awp a. Min chhuahsan dawn khan Administration chu a phel darh zawnga min dahin a then Burma (tuna Myanmar) ah, a then East Pakistan (tuna Bangladesh)ah, a then India ah min dah a. Chutichuan, zofate chu hmun thumah min thendarh ta a ni. Chutia thendarh kan ni chung chuan kan in unauna chu a bo thei chuang lova. Hun a lokal a, inzawmkhawm lehna kawng zawngin mi thahnemngaite chuan UNO ah thlengin an zualko mek a ni.
Chutih mek laiin Myanmar chu sipai sawrkarna hnuaiah lutin namen lovin an buai a. Myanmar lama cheng kan unaute pawh unaute belin helamah an lokal a. An zinga misual thenkhat in pawi te pawh an lo khawih ta hial bawk. Mahse, chung pawikhawihna chu danin an chungah ro a rel mai dawn a. A hnam ang leh a hlawma misual anga puh a, vauna lo chhuah mai chu thil dik ani ngai lovang. Kolasib lam miin pawi khawih sela, Kolasib lam zawng zawng puh tur ani thei lovang tih hi kan ngaihtuah dan tur ni awm tak a ni ang. Chuvangin, kan khawpuia zirlai pawlte hian an thuchhuah hi thlir nawn leh sela. Hnam inzawmkhawmna kawngah pawi an khawih tih hriain hnukkir leh se a duhawm khawp mai.