Damdawi lam a zir laiin Subhash Tukaram Patil-a chuan tual a that a, kum 14 zet lung in a tan hnuah a zir chhunzawm leh a, tunah chuan doctor a ni ta!
Patil-a hi kum 2002 khan a bialnu pasal a thah avangin mana thiam loh chantir a ni a, kum 14 zet lung ina hun a hman hnuah a nungchang a that avangin chhuah a ni a. A zir lai chhunzawm leh nghalin nikum khan a zir zo va, Inrinni khan convocation-ah MBBS degree hlan a ni.
Tunah chuan Patil hi kum 40 zet a ni ve tawh a, Bhasagi khuaa cheng niin an awmna hi Karnataka khawpui, Bengaluru atanga km 475-a hla a ni.
“Hyderabad Education Society hnuaia Mahadeveppa Rampure Medical College, Kalaburagi-a MBBS course ka zir laiin man ka ni a, ka tannaah hian OPD-ah ka thawk thin,” tiin Patil chuan a sawi.
Tun thla tir khan MBBS zir zawh hnua kum khat chhung internship an tih ngai thin chu a ti zo ta bawk.
August 15, 2016 khan lung in atang hian chhuah a ni a, Rajiv Gandhi University of Health Sciences chuan special permission pein a college kalna thinah hian a kal chhunzawm leh a, a vawi khat beihnaah subject zawng zawng a pass vek a. Nikum kum tir atang khan Basaveshwar Hospital-ah internship a ti zui ta a ni.
Patil chuan, “Vantlang tana inhman hi ka duh thin a, a bik takin lung tang leh sipaite tan. Ka hun tam zawk kha jail library-ah hmangin zirna ka ngaihven hi engtik lai mahin a bâng ngai lo,” a ti.
Lehkha a zir hmasak hun lai hian ngaihzawng a nei a, mipa dang, excise contractor-in lo ngaizawng vein pasal atan a nei ta a. Patil-a thinrim chuan a pasal hi a thahsak a. Kum 6 chhung chu Parappana Agrahara Central Jail, Bengaluru-ah tangin Kalaburagi Central Jail-ah sawn leh a ni a. Lung in a tan chhung hian Karnataka State Open University atangin journalism course a zir zo hman bawk.
MRMC dean Umeshchandra chuan Patil-a hi a zirpui dangte aiin kum 14 zetin a upa zawk tih a sawi a. Basaveshwar Hospital-a ENT specialist pakhat, MRMC-a zirtirna pe thin, Dr. Kiran Patil pawhin Subhash Patil nen hian kum 2002 khan an inpawl rual thin tih a sawi a. “Lung in atanga chhuaka a zirlai zir zovin, hlawhtling taka a chhuak thei hi thil lawmawm leh mak tak a ni,” a ti.