Aizawl : District Horticulture Office, Serchhip-in Serchhip Bazar building-a nimina Thlai thar kut cum Exhibition an buatsaih chu Horticulture Department Secretary K. Lalrinzuali’n a hawng.
Horticulture Department Secretary chuan “mitaima, kuthnathawktute hi an zahawm em em a, nasa takin an zar kan zo a ni tih hi hre thar zel ang u”, tiin kalkawmte chu a sawm a. Kuthnathawktu hlawhtling tak tak te hlawhtlinna chu sawrkar puihnaa innghat ni lovin an taimakna leh an rinawmnaa innghat a ni zawk tih a sawi.
Sawrkar in a lo tih ve ber chu hnathawktu taima ten hlawk zawka an tharchhuah theih nan a tihdan phung zirtir a nih thu K Lalrinzuali chuan a sawi a. Serchhip district-a kuthnathawk tute chu Mizoram chawmtu ni thei tura tan la leh zual turin a sawm.
Department-a thawktute pawh loneitute chu an mipawimawhte an ni tih hriaa duat tura chahin, “tha taka hna an thawh hian a rah chu loneitute atangin a lo lang thin a ni”, a ti bawk.
He hun hmanpuitu dang Horticulture Department Joint Director M. Vanlalzami pawhin Covid hri len lai pawha Mizoram mipui ten ei tur an tlakchham loh nana Supply chain kalpui a nih lai khan Serchhipa kuthnathawktu ten mipui ei tur an thawnchhuak nasa hle tih a sawi a. Khatih lai ai maha nasa zawk thar chhuak tura tan la zel turin loneitute a chah a ni.
Loneitute aiawha thusawitu Agri & Horticulture Cooperation Society Chairman Lalramthara’n thlawh hma an lak danah ram ngaw tichhe zawnga thlawhhma an neih ngai loh thu a sawi a. An hmalakna azara hnathawh tur leh hlawkna teltu mithahnem tak an awm chu lawmawm a tih thu a sawi. Sawrkar department hrang hrangin an puihbawm nasat zia sawiin, lawmthu a sawi bawk.
Exhibition-ah hian intihsiakna pathum – Floriculture, Vegetable leh Spices & Fruits ah te buatsaih a ni a, mi 77 in an thlai tharte an pho chhuak a, an zinga a tha zual pathum te hnenah lawmman hlan a ni.