US President Joe Biden-a chuan Israel-Gaza indo mek chu ‘karleh Thawhtanniah’ inkahhai puan theih a beiseiawm tih a sawi.
Israel leh Hamas aiawhte Qatar-a an inbiak meknain a êng lam a hawi tih sawi a awm mek laiin Biden-a hian a sawi a ni.
“Ka national security adviser chuan kan hnaih tawh tih min hrilh a ni,” tiin Biden-a hian a sawi a ni.
Israel hian October 7-a Hamas silai kengten Israel chhim lam luhchilha mi 1,200 chuang an thah hnuah phuba lak nan Gaza hi a rûn ve a ni.
Israel luhchilhtute hian mi 253 lai manin an lamah an hruai bawk a, eng emaw zat erawh an chhuah tawh.
Hamas hnuaia awm health ministry chuan Israel-in a beih hnuah Gaza Strip-ah hian mi 29,878 vel an thi tawh niin an sawi a, darkar 24 liam ta maiah pawh mi 96 an thi tih an sawi a. Hliam tuar pawh mi 70,215 an awm tawh bawk.
Israel nena inthian tha tak, President Biden-a chuan New York City-a thuthar lakhawmtute an kawmnaah inkahhai puan a nih theih thu hi a sawi a ni.
“Kan hnaih tawh hle,” tiin Thawhtanni khan a sawi a. “Kan la tifel chiah lo va, Thawhtanni lo awm turah hi chuan ka beisei a, inkahhai puan a ni ang,” a ti.
US State Department thupuangtu pawhin a hmain ni eng emaw zat liam ta atang khan Hamas-in an la hren Israeli-te chhuah an nih theih nan ‘thil kalpui mek’ a nih thu a sawi a; mahse, Hamas hian rawtna awmte an pawm dawn em tih erawh hriat a ni lo tih a sawi.
“Egypt, Israel, United States leh Qatar te nen inbiakna kalpui mek a ni,” tiin Matthew Miller-a hian a sawi a ni.
Kar hmasaah khan US hi UN Security Council-ah a rang thei ang bera Gaza-a inkahhai kalpui tura a thuneihna (veto) hmanga thu a tihtluk avangin dem a hlawh hle a. Ama thuin inkahhai puan dan tur a ruahman a, Israel chu Gazan chhim lam khawpui, Rafah bei lo turin a ti bawk.
Israel chuan a sipaite chu Rafah-a Hamas fighter-te bei turin an inpeih vek tawh tih a sawi a. Pathianni khan prime minister pisa pawhin an sipaite hnen atangin khawpuia civil mi awmte thiar chhuak tura tihna thu an dawng tawh niin a sawi bawk.
Hmar lama indona a nasat avanga chhim lama tlanchhia mi tam tak, Palestinian maktaduai 1.5 vel zet awmna Rafah run lo tur hian ram tam takin Israel hi an nawr a ni.
Hetiang boruak a awm mek lai hian Palestinian Authority (PA) Prime Minister Mohammed Shtayyeh chu a thawhpui zawng zawng nen an bang a, anni hi West Bank lam luahtute an ni.
President Mahmoud Abbas chuan an banna hi a pawmpui a, technocratic government dinna kawng a inhawng mek.
Abbas-a hi US chuan PA thuam thaa Israel-Hamas indo a zawh hnua Gaza pawh enkawl tura intichak turin a ti nasa hle.
Kar hmasa khan Netanyahu-a hian indo zawh hnua Gaza kalpui dan tur a sawi a, hetah hian PA inrawlhna tur erawh a sawi lang tel lo thung.