Egypt khawpui, Cairo-a rel station lian bera nimina kangmei nasa tak chhuakah mi 25 vel an thi a, mi dang 50 velin hliam an tuar bawk.
National Railway Authority chuan central Ramses Station-ah relin dawr ban a su a, hemi hnuah hian a tui bawm (fuel tank) chu puak zuiin platform leh a bul hnaia inte a kang kai niin an sawi.
Prime Minister Mostafa Madbouli chuan chhiatna thlenna hmun hi a tlawh tawh a, chhiatna thlen chhan hriat a la nih loh thu a sawi a. Fimkhur tawk lo leh he thil thlen chhan erawh chhuiin a mawhphurtu chu hrem an nih tur thu a sawi a. “A mawhphurtu kan chhui chhuak ang,” a ti.
Social media-a thlalak leh video thehdarhah chuan rel leh a platform a kang nasa hle a, mipuiin thi leh hliam tuarte chhanhim tura an bei lai pawh a lang a ni.
Egypt-a railway system hi a him lo hle a, sorkarin a ngaihthah bakah inrelbawlna tha tawk lo an tuar nia sawi thin a ni a. August 2017 pawh khan Mediterranean tuipui kam, Alexandria khawpuia passenger phur rel pahnih insuin mi 43 an thih bakah mi 100 chuangin hliam an tuar.
Kum 2002 pawh khan Cairo bulah passenger phur rel a kang vak tawh a, hetah phei chuan mi 370 chuang an thi a, hei hi an rama rela chhiatna thleng lian ber a la ni nghe nghe.