Yupia, Arunachal Pradesh a khelh mek Fifa Santosh Trophy 2023-24 ah vawiin chawhma dar 10:00 hian Mizoram in fiahna hautak a hmachhawn dawn a, hmarchhaka an elpui lian Manipur nen an inkhel dawn. Manipur lakah an chak a nih chuan Mizoram hi quarter-final lut turin an dinhmun a tha tawh viau dawn.
Group B-a team awm parukte an inhneh tawn kual hlawm them. Delhi in Railways an sawp a, Railways sawptu Delhi hi Mizoram in an sawp ve leh. Mizoram in Maharashtra an hneh lova, Delhi laka tlawm Railways in Maharashtra hi an hneh ve leh thung. An inhneh kual them lai hian Group B-a khel tha tluang ber chu Manipur an ni. Manipur hian vawi thum khel tawhin tlawm an la nei lova, point 7 hmuin an group-ah hma an hruai mek. Manipur hi Railways nen 1-1 a an inhnehtawk hnuin 2-1 in Maharashtra an hneh a, champion lai Karnataka chu 1-0 in an hneh zui leh bawk.
Manipur an khel that tluan loh laiin Mizoram erawhin bul an tan tha lo. Maharashtra lakah an tlawm hnuin Karnataka lakah 2-0 a an hmahruaina an humhim zo lova, uiawm takin an chak zo lo. Pressure na tak hnuaiah huaisen takin an inlan a, an khelh hnuhnung berah 5-1 ngawtin Delhi an sawp. Delhi laka an khel that vangin Mizoram hian inrintawkna sang zawk an nei thar a, Manipur an hmachhawn hun tur hi an tan hun tha a ni.
Manipur hian an hneh chak ber tur Mizoram an hneh a nih chuan quarter-final an lut chiang tawh dawn a. Quarter-final lut turin chak ngei an tum ang a, Mizoram lakah an theihna sang ber leh tlem an hlan ang. Point 7 an hmuh tawh vangin Mizoram lakah tlawm an pumpelh thei a nih chuan Manipur tan hian quarter-final lut turin an dinhmun a tha zui hle dawn bawk.
Point li hmu mek Mizoram tan Manipur an hmachhawn tur hi thih leh dam ang hiala pawimawh, an dinhmun hril thei a ni. Manipur lakah an tlawm a, an elpui dangte an chak a nih bawk si chuan Mizoram dinhmun a chhe thei viau dawn a. Manipur nen an inhnehtawk a nih pawhin an dinhmun a la him dawn lova, Railways lakah chak ngei ngei an mamawh zui ang. An khelh hnuhnung berah Railways an hneh a nih pawhin team dang result-ah an inngah a ngai zui thei tho bawk.
Chhuak hmasa lamah kan tarlan angin Mizoram leh Manipur inhmachhawn tur hi Mizote tan chuan World Club final tluk hiala inkhel ngaihven hlawh a ni a. Chawhma dar 10:00 hian Zote thinlung chu Yupia lamah a thle rual thup dawn.