City in Luton Town an sawp

Thawhleh zan khan FA Cup fifth round khelh a ni a, champion lai Manchester City chuan an khingpui Luton Town chu 6-2 ngawtin an sawp. Luton an sawp tum hian Erling Haaland chuan City tan goal nga ngawt a thun. Thawhleh zana inkhel dangah Newcastle United leh Leicester City ten hnehna an chang ve bawk.

  • Dan theih loh Haaland

FA Cup champion lai Luton Town hmachhawn turin Kenilworth Road-ah an lenglut a, an lenluhna mualah tha chungchuang takin an khel. Luton Town hian City goal thun khawl Erling Haaland an dang thei lova, Haaland hian goal nga ngawt a thun. Goal thun lamah EPL-a record duhawm tak tak kawltu Erling Haaland hian minute 3-na lekah Kevin de Bruyne siam tha tak chu chiang zetin a pet goal a, hmahruaina goal a thun.

Hma takah goal an thun vangin City an khel tha chhunzawm viau a, goal pawh an thun belh leh thuai. Goal hmahruai thuntu Haaland chuan minute 18-naah De Bruyne siamsak atang bawkin an goal hnihna a thun zui leh nghal. Goal hnih thun tawh Haaland hian minute 40-naah De Bruyne ball pek fing tak um tlangin an goal thumna a thun a, hattrick a siam. Goal thum an chhuah zawn hnuin Luton Twon hian chawlhlawk hmain goal khat an thun. Minute 45-naah Jordan Clark chuan tawih zetin a pet goal a, an si phurh a sut then.

Chawlhlawk hnu lamah inkhel a hmuhnawm chhunzawm a, team hnih ten goal an thun thuai. Minute 52-na lekah Luton Town tan Jordan Clark chuan an goal hnihna a thun a, City nen an inkar a tizim. Goal hnih an thun zawn vangin Luton phur thar mah se an phur rei lova City in goal an thun belh thuai. Minute 55-naah De Bruyne siam sak atangin Erling Haaland chuan an goal lina a thun a, an hmahruaina a tizau. Haaland hian minute 58-naah Bernardon Silva siamsak atangin an goal nga a thun zui leh bawk. He inkhelah hian Belgium midfielder Kevin de Bruyne a chetha viau a, goal thun lo mah se goal li ngawt a siamchhuak thung. Goal nga ngawt thuntu Haaland hian City a zawm hnuin inkhel vawi 83 a hmachhawn tawh atangin goal 83 a thun tling der tawh.

Haaland-a’n goal nga a thun zawn hnuin minute 72-naah Mateo Kovacic chuan City goal rukna thunin a tawp a khar a. Luton Town chu an tualzawlah ngei 6-2 ngawtin an sawp a, City hian an trophy kawl mek humhim turin hma an sawn hret a, quarter-final an inhlangkai.

  • Newcastle leh Leicester City an tlang

Thawhleh zana inkhel dangah Newcastle United chu an lenluhna mual Ewood Park-ah goal chhuah hmasa zawkah an tang naa hun pangngaiah tlawm an pumpelh hram. Mualneitu Blackburn Rovers tan hian Sammie Szmodics chuan minute 79-naah hmahruaina goal a thun. Goal thun hmasa zawk an nih vangin lawm viau mah se an lawm rei lova, goal an chhuah thuai. Newcastle United tan hian minute 71-naah Anthony Gordon chuan goal a thun a, an si phurh a sut.

Goal khat ve ve an thun hnu hian hun pangngaiah goal thun belh thei an awm lova, penalty shoot-out hmangin quarter-final lut tur zawk zawn chhunzawm a ni. Penalty-ah hian Blackburn tana pettu hmasa ber Sammie Szmodics in a thelh a. Newcastle tana pettu pahnihna Harvey Barnes-a’n thelh bawk mah se Blackburn tana pet hnuhnung ber Dominic Hyam-a’n a thelh laiin Newcastle United tan Anthony Gordon chuan an a pet goal a, Magpies a chakpui a, quarter-final a hruai thleng.

Inkhel dangah EPL club AFC Bournemouth chu an mikhual Leicester City chu an mikhual Leicester City lakah an mualpho a, championship club lakah an tlawm. Vitality Stadium-a inkhelah hian goal a lut har hle a, minute 105-naah Fatawu Issahaku chuan Leicester City chakna goal a thun a, quarter-final an lut zui ta a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427