English Premier League (EPL) ah tunhnaia chetha, goal thun tawl tawk thin Arsenal chuan thawhtan zan khan table mawngphaha awm mek Sheffield United chu 6-0 ngawtin an sawp a, an chak chiang leh viau. Sheffield United sawptu Arsenal hian an chunga awm Liverpool leh Manchester City te nen an inkar an tizim nawn leh.
Bramall Lane-a lenglut Arsenal hian Sheffield United lakah an khel tha chungchuang hle a, dakar khat em pawh an khelh tlin hmain goal ruk an thum hman der tawh. Mualneitu Sheffield United in an si phurh sut tum viau mah se inrintawkna sang tak nena inlan Gunner tlarhnung an thiat thei lo tluan. An mualah chiang zeta an tlawm leh tak vangin Sheffield United hian table mawngphah an luah zui phah.
Hmahruaitu Liverpool nen an inkar tizim tura chak mamawh Gunners tan hian captain Martin Ødegaard chuan inkhel tan atanga minute ngana lekah chiang zetin a pet goal a, hmahruaina goal a thun. Hma taka goal an thun hian Arsenal tan inrintawkna sang zawk a siam a. Mimuala inlan mah ni se insum kar hauh lovin Laipui an hmet puak zui dur a, Bramall Lane-ah tlang an tlir dup dup.
Martin Ødegaard goal thun hnuin Gunners hi an khel tha zui viau a, na takin an khingpuite an nawr zui zel. Fuh taka an khingpuite an nawr tlang hnuin Saka ball cross hlauhawm tak mai chu Jayden Bogle chuan an lamah a ti-goal a, Arsenal hmahruaina a tihzau sak. Own goal a awm hnu lawk hian Arsenal in an kut zalah ngei goal dang an thun belh zui leh nghal zat. Minute 15-na lekah fuh taka ball a inpek tawn hnuin Gabriel Martineli chuan chiang zetin a pet goal a, an goal thumna a thun.
Minute 15 chhung leka goal thum thun hman Arsenal in an duhtawk mai lova, goal an thun belh chhunzawm zel. Minute 25-naah Martinelli siamsak atangin Kai Havertz chuan an goal lina thunin an hmahruaina a tizau a. Chawlhlawk hma minute 39-naah Declan Rice chuan an goal ngana a thun belh zui leh cheu a, si nga fai zeta hmahruai chungin chawlhlawk an hmang.
Chawlhlawk hnu lamah Arsenal an khel tha chhunzawm a, goal pawh an thun belh leh thuai. Minute 58-naah defender Ben White chuan an goal rukna a thun a, an chakna a nem nghet. Goal ruk ngawt an thun hnuin Mikel Arteta team te an khel tha zui viau naa goal an thun belh thei tawh lo. Sheffield United pawhin an si phurh sut tur khawpin an khingpuite an nawr tlang tak tak thei lo bawk a, goal dang luh belh lovin inkhel a tawp.
Sheffield United lakah chiang taka hnehna chang Arsenal hian khelh 27 atangin point 61 an hmu a, pathumnaah an awm chhunzawm. Gunners hi hmahruaitu Liverpool nen an inkara point hnih a tla zep mek a. Pahnihnaa awm mek Manchester City nen an inkarah point khat a tla zep mek bawk. Tunhnaiah an khelh that zawn em vangin Arsenal hi goal diference-ah an tha fal tawh a, champion beiseina an chawk nung thar zel. Arsenal in champion an beisei san deuh deuh laiin Sheffield United dinhmun a chhe tulh tulh thung a, khelh 27 atanga point 13 chiah an la hmuh vangin championship lamah tlak an hnaih deuh deuh zel.