March 5, Thawhleh zan khan MSL semi-final 1 – thawhhnihna khelh a ni a. Thawhkhatnaah Zarkawt BCA laka tlawm tawh Champhai Basketball an tlawm nawn leh a, an tan final luh beisei theih a ni ta lo. Zarkawt BCA hian champion lai Khatla TBL leh Bungkawn LB Associates te inkhela chak zawk zawk final-ah an hmachhawn ang.
Champhai Basketball hian semi-final thawh khatnaa an tlawm tawhna chhang letin, hnehna chan let ngei an tum hle. Team lian leh hlun BCA lakah bul tan tha lovin, quarter hmasa pathumah hnufual zawk ni vek mah se quarter hnuhnung berah an point 8 laiin an chungnung. An khingpuite lehthal tum viau mah se, point 10 in an lehthal zo ta lo thung.
Champion tura rinkai BCA hian Champhai lakah bul an tan tha viau a, quarter khatnaah point thumin an chungnung a. Quarter hnihnaah point li a an chungnun hnuin, quarter thumnaah point 11 zetin an chungnung zui leh a, point 18 zeta hmahruai chungin quarter hnuhnung ber an hmachhawn. Quarter hnuhnung berah an inthlahdul hret a, Champhai in point 8 in an inkar tizim mah se, BCA chak tur an dang thei ta chuang lo. Season kal mekah tlawm la nei lo Zarkawt BCA chuan an trophy hloh tawh la let thei turin final an inhlangkai ta a ni.
Champhai an hneh tum hian Zarkawt BCA tan Emmanuel Malou chuan point 28 a thawkchhuak a, an chak nawn theih nan a thawhhlawk hle. BCA tan hian Zonunsanga’n point 22 a thawhchhuah bakah Lalrina Renthlei chuan point 19 a thawkchhuak ve bawk. Champhai tana point thawkchhuak hnem ber Lalropuia chuan point 24 a thawkchhuak ve thung.
Nizan dar 8:00 khan Bungkawn LB Associates leh Khatla TBL ten semi-final thawh hnihna an khel a. He thu i chhiar lai hi chuan MSL 9 final-a intum tur i hre tawh mai thei a ni.