Thawhlehni khan Mizoram Merchant Association (MIMA) hruaitute chuan Synod Senior Executive Secretary hmuin, nikuma Synod Inkhawmpuiin Mizoram a hnamdang dan lova sumdawng tih rem chungchang a lo pass tawh chu lawmawm a tih thu sawi pahin rawtna an neih hrang hrangte an thlen nghal.
Mipuite zah tak leh ngaih pawimawh tak, Synod meuhin Mizoram leh Mizo hnam himna kawnga pawimawh em em, ‘Mizoram a hnam dang dan lova sumdawng tihrem tuma hma a lak chuan hlawhtlinna a hmuh ngei ringin’ a tulna apianga tawiawm turin MIMA pawh a inhuam reng thu an thlen bawk.
Hemi hunah hian Mizoram chhunga hnam dangin sumdawnna aṭanga min chim ral mek thu te, keimahni a Mizo ngei ten hming hawhtira hnamdang dawr hawn theihna tura hma laksak ṭhin an awmte chu pawi an tih thu an sawi bawk a ni.
Mizo hming hawhtir ṭhenkhat pawh an hming hawhtir ten chhiah an pek ṭhat loh avanga buaina tawk sawi tur an awm thu leh, a buai zawk a chu hming hawhtirtu te bawk an nih tak avanga fimkhur hle a ngaih tawh thute an sawi.
Kan hnam venhimna tur atana dan tha tak kan neih, 2years validity ILP pawh hmang tha ngam lova kan awmte chu pawi an tih thute, ILP pawh hnam himna atana hman ṭangkai anih theihna turin ennawn theih nise an duh thu te pawh an sawiin, chubakah Mizoram a himna zawnga lo lut, Foreigner te an duh duha dawr an siamte chungchang pawh ngaihtuah a tul thu an thlen bawk.
Hun reiloteah Mizoramah Rel lo lutin, kawngpui lianpui puite ala thlur sung dawn bakah, Lawng lian thlengin a lo thleng dawna, tuna economic a min chimral mek tawhdan ngaihtuah hi chuan, chung hun alo thlen hun chuan economic assimilation hi a thlen ngei an rin thute sawipuiin, Sakhuana a inchimral hi chu a thleng mawh viaua, Economic Assimilation erawh inchimralna awlsam tak anih thute an sawi bawk.
Synod Senior Executive Secretary Rev. C Zorammawia chuan MIMA hruaitute chu alo dawngsawng tha hle a, Mizoram a hnamdang dan lova sumdawngte tihrem dan chungchanga hmalatu tur an ngaihtuah dante sawiin, inkawmhona hun tha tak an neih thu an thuchhuahah chuan an tarlang.