Mizoram in fiahna hautak a pal tlang a, Fifa Santosh Trophy khel mekah semi-final an lut. Mizoram hian nilai zana an khingpui Kerala chu penalty shoot out-ah 6-5 in an hneh.
Golden Jubilee Stadium, Arunachal Pradesh a inkhel hmuhnawm takah Mizoram leh Kerala an inhnehtawk viau a, minute 120 chhungin goal thun thei an awm lo. Tantu nei ngah Mizoram hi hun pangngaiah chak theihna hun nei tha zawk an ni a. Goal thun theihna hun tha nei ngah zawk ni bawk mah se, goal an thun thei bik lo. Hun pangngai leh extratime-ah goal thun thei an awm loh vangin penalty shoot out hmangin semi-final lut tur zawk tihchian a ni.
Mizoram tana penalty pettu M.C. Malsawmzuala, Malsawmfela, F.C. Lalhmunmawia, E. Lalremtluanga, L. Tochhawng, Lalremruata leh Lalbiakthanga ten an pet goal vek a, 6-5 a hma an hruai laiin Kerala tana pet hnuhnung ber Sujith V.R chuan goal pawnah a pet a, a thelh chiang hle. Sujith V.R-a’n a thelh vangin penalty petchhunzawm a ngai tawh lova, Mizoram in tunhnaia an hneh hleih theih loh Kerala an hneh a, semi-final an lut. Semi-final-ah Services an hmachhawn zui leh dawn.
Semi-final-a Mizoram hmachhawn tur Services hian Santosh Trophy final vawi 11 an khel tawh a, vawi ruk champion in, vawi nga tlawm zawkah an tang tawh. An champion hnuhnung ber chu 2019 ah a ni. Inelna neih mekah Group A atangin bul an tan a, Goa hneh lo mah se group champion ni chungin an tlang. Quarter-final-ah 2-0 in Railways an hneh a, semi-final an lut. Quarter-final ah 2-0 a an hneh Railways hi Mizoram in 4-0-a an lo sawp tawh kha a ni a, Mizoram in quarter-final-a an hneh tak Kerala kha Services nen 1-1 in an inhnehtawk bawk. An khelh chhoh dan enin Mizoram in final luh theihna hun tha an nei.
Mizoram leh Services te hi an intum hnuhnung ber chu October 15, 2023 kha niin, Santosh Trophy-ah a ni a. Mizoram hi Services lakah 2-1 in an chak lo. Kum 2023-a an tlawm tawhna chhang letin, tun tumah hian hneh an tum hle ngei dawn. Services ah hian Mizo defender Zothanpuia a tel a, Thanpuia tan pawh inelna lianah mahni ram ngei hmachhawn chu a dan a dangin, a inthlahrunawm duh viau ta ve ang.
Semi-final hi March ni 7, Ningani ah khelh a ni dawn a, chaw hnu dar 2:30 ah Mizoram leh Services an inkhel ang a. Zan dar 7:00 ah Manipur leh Goa an inhmachhawn zui ve leh ang. Mizoram in Services an hneh a, Manipur in Goa an hneh ve bawk a nih chuan final-ah Mizoram leh Manipur an inhmachhawn thei dawn a. Group stage-a an hneh loh Manipui lakah Mizoramin phuba an la thei dawn tihna a ni. Final-ah Mizoram leh Manipur an inhmachhawn ngat a nih chuan Mizote dream final a thleng dik dawn tihna a ni a. World Cup final tluk zeta boruak sang, Mizo mipuite ngaihven mai ni lo, an lak thu tak em em tur a ni ang.
Inelna neih meka khel tha tluang tak Manipur hian quarter-final-a an khingpui Assam chu 7-1 ngawtin an sawp a, Santosh Trophy 2023-24-ah tlawm nei lovin hma lam pan zelin a vawi hnih nan champion an tum hle.