Indian Prime Minister Narendra Modi chuan kum 2019-a anmahnia an inrelbawlna hran hlihsak an nih hnua a vawi khat nan Ningani khan a ram chhunga Muslim tam zawkna, Kashmir phaikuam a tlawh.
India-ah hian inthlanpui a hnai tawh a, Modi-a pawh hi Srinagar-ah campaign-in vantlang inkhawmah thu a sawi.
BJP chuan venhimna khauh tak hnuaiah mi sang chuang fe pungkhawm turin an ko khawm nia sawi a ni.
Kum 1980 chho atang tawh khan heng lai hmunah hian India awpna hnuaia duh lova ralthuam neia beitu an chet nasat avangin mi sang tel an lo thi tawh.
Kashmir hi kum 1947-a Britain awpna laka an indan rual khan India leh Pakistan hnuaiah an awm a. Nuclear ralthuam nei ram pahnih hian a vaiin an ta ve ve nia inchhalin vawi hnih lai an lo indo phah tawh.
Danpui hnuaia Kashmir-in inhung bikna a neih chu inthlan dawna a intiam angin Modi-a sorkar chuan kum 2019-a thlan tlin leh an nih hnu lawkah a hlip a. Article 370 hnuaiah hian Jammu & Kashmir state hian inrelbawlna hran neiin mahni puala flag, legislature, dan leh thupek pawh nei hrang thei an ni thin.
India rama state zinga Muslim ber an nihna awm chhun a ni a. Article 370 hlih a nih hnuah hian mi cheng maktaduai 12-te chu sorkar laipui atanga awp turin union territory pahnih – Jammu & Kashmir leh kilkhawr leh tlangram, Ladakh-ah then a ni nghal bawk.
Inhung bikna hlih a nih dawn khan Modi-a sorkar chuan sipai tam zawk a dah luh belh a, mi tam takin mak tiin an nunphung pawh an tibuai niin an sawi a; mahse, Modi-a thlawptute erawh chuan tha an ti thung a. Sikul leh college pawh khar niin khualzinte chu haw tura tih an ni a, telephone leh internet service tihtawp niin tual chhunga politics hruaitute chu pawn chhuak thei lova tiin thenkhat chu India hmun dangah lung inah dah an ni bawk.
Modi-a’n Ningania a tlawh hi mi thiamte chuan BJP-in campaign an thlak tanna tur leh heng laia chengte hmin tuma ke an pen tanna niin an ngai.
Prime minister hian February-a Hindu tamna, Kashmir a tlawh tum ang bawkin hmasawnna ruhrel dinna tur tam tak a puang a ni.
Mi thiamte chuan tharum thawhna leh venhimna khauh taka kalpui a la ni chungin Modi-a hian mipuite hnenah boruak a pangngai leh tawh lantir a tumna niin an ngai a. A kaihhruai sorkar hian India ram hmun dangte ang bawkin cheng tam tak man hmasawnna tur thil dina Kashmir economy tihkân an tum tih lantir a tum bawk niin an sawi.
Jammu & Kashmir hian inhung bikna a neih lai kha chuan pawn lam miin sumdawn nan ram a lei thei lo va, mi tam tak chuan hei hi an tangkaipui hle niin an sawi nghe nghe.
Srinagar-a mi mal company-a thawk pakhat chuan Article 370 hlih a ni chu ‘a dik lo tak zet’ tih a sawi a, prime minister hun hmanna turah pawh tel a tum lo niin a sawi a. “Engtikah nge ram chhung hmun tinah Muslim-ten tihduhdah an tuar tih hi a sawi ve dawn?” a ti.
Mi dang pakhat pawhin, “Electric man a sang em em a. Buhfai pawh a harsa a. Thil man a sang chak em em a, chutiang sorkar thu sawi chu engvangin nge kan ngaihthlak ang?” a ti bawk.
February-a Jammu a tlawh tum khan Modi-a hian Article 370 chu than tithutu niin a lo sawi tawh a. Supreme Court-a miin an khinnaah court sang ber hian sorkar chet dan chu dik lohna awm lo a ti a; mahse, Jammu-Kashmir chu state an nihna a rang thei ang bera pe leh turin a ti thung.
Modi-a hian thu a sawi hmain Srinagar-a sipai hmunpui a tlawh hmasa a. Sipaite hi venhim hna an thawhna kawngah mihring dikna chanvo palzuta puh an ni fo tawh thin.
A tlawh dawn avang hian Srinagar-a kawtthlerte chu tihfai niin amah lo lawmna thu chi hrang hrang tar a ni a. Sorkar hnathawk tam tak chu thu a sawina hmunah hian tel tura tih an ni hlawm bawk.
Kashmiri chief minister hlui, Omar Abdullah chuan inkhawma tel zinga mi zawng zawng deuhthaw chu anmahni duhthua tel an awm lo niin a sawi a. “A tel leh tel loh hi duhthlan theih a ni lo va, tih ngei tura tih a ni zawk. A kal lote chu an chunga hremna lek hiala vau an ni,” tiin X-ah a tar lang.
Modi-a’n thu a sawina tur hmun, Bakshi stadium-ah chuan vengtu tam tak dah an ni a. Srinagar-a lirthei lut leh chhuakte chu uluk lehzuala endik an ni a, mipuite pawh en uluk an ni.
Ningania Kashmir a tlawh tur bakah hian Modi-a hian inthlanpui awm tura campaign-in hmun dang dang a la tlawh dawn a. Nilaini pawh khan West Bengal-a Kolkata-ah tun hnuai rel tlan tur a hawng a ni.