Chhattisgargh-ah Congress MLA tanglai pahnih chuan rorel lai, Telangana Rashtra Samithi (TRS) zawm turin thutlukna an siam a, nikuma assembly inthlana an chak loh hnuah leh Lok Sabha inthlanpui lo awm mai turah Congress party tan chhiatna ni theia ngaih a ni.
Tribal MLA pahnih, Asifabad district-a Asifabad bialtu, Athram Sakku leh Bhadhradri Kothagudem district-a Pinapaka bialtu, Regula Kantha Rao te hian Congress hi chhuahsanin chief minister K.Chandrasekhar Rao-a kaihhruai TRS hi an zawm dawn tih an tichiang tawh.
Anni bakah hian Telugu Desam Party (TDP) hruaitu leh MLA pawh vawi 4 lai ni tawh, Sandra Venkata Veeraiah pawhin TRS zawm a duh thu a sawi tawh bawk.
TRS hian eptu MLA eng emaw zatin chief minister hi an âwn mek a, an party zawm thei hnai an la awm ual niin an sawi bawk.
MLA pathum bâng TRS an zawm a, hei hi Thawhlehni maia legislative council inthlan lo awm turah pawh Congress tan chhiatna a ni phak thei bawk nia sawi a ni.
Congress hian Chhatisgrah-ah hian MLA 19 neiin an thawhpui, TDP-in pahnih an nei a. Inthlan hi bial 4-a neih tur niin bial 1 tal an lak theih an inbeisei laiin an party chhungah buaina a awm mek a, an inbeisei ang an tlin lo thei nia sawi a ni a. Council member 119 awm theihnaah Congress hian 18 an nei sa a ni.
Congress leh TDP MLA an bân hnuah TRS hian state assembly-ah MLA 93 an nei ta a. KCR-a party hian inthlan hnuhnung ber khan MLA 88 neiin Independent MLA pahnih leh TRS MLA-ten an zawm leh bawk a ni.