Pakistan chuan Islamist helho lakah beihpui a thlak zel tih a puang a, nimin thleng khan sakhaw sikul 182 zet chu an thuhnuaia an lak thu leh dan pawna an hnawl firfiak pawla tel mi 121 an man tawh tih an puang.
Interior ministry chuan he thil an tihna hi hun rei tak ata an lo inruahman tawh a nih thu leh tun hnaia Indian mipuite thinrimna avanga New Delhi-in Islamabad chu Pakistan ram chhunga helho laka che ngam lo anga a puhna chhan letna a nih loh thu a sawi.
Pakistan-a inkulh firfiak pawlten India ramah pawi an khawih fo avang leh February 14-a Jaish-e-Mohammed (JeM)-in Indian paramilitary police 40 zet thihchilha an thah avangin ram hrang hrangin Pakistan hi an nawr na hle a ni.
Pakistan interior ministry chuan province sorkar hrang hrangin seminary (sakhaw sikul an tih) hrang hrang 182 zeta an inenkawlna leh inawpna (management & administration) chu an laksak tawh tih a sawi a. “Law enforcement agency-ten hel pawa tel leh inzawmnna nei nia hriat mi 121 an man tawh bawk,” an ti bawk.
Muslim ram, Pakistan-ah hian sakhaw sikul (religious school)-te hi thalai zawkte hnena sakhua leh chi avanga inthleina inzirtirna hmun bera ngaih a ni a, chutih rual chuan mi rethei fa maktaduai telte zirna petu a ni bawk.
Dan pawna an dah apawl, JeM-te pawhin seminary an nei teuh va. Jamaat-ud-Dawa (JuD) an tih pawhin mi tanpuina pawl leh sikul an ngah a, sikul 300 chuang zet an nei.
Interior ministry chuan sikul an laksakte hi pawl hrang hrang enkawl a nih thu an sawi a, heng zingah hian sikul leh college 34, dispensery 163, ambulance 184, damdawi in panga leh dan pawna awm pawl pisa pariat a tel thu an sawi.