Aizawl: Mizoram Pradesh Youth Congress Committee (MPYCC) leh Mahila chuan nimin khan State Bank of India (SBI) Main Branch kawtah Supreme Court-in Electoral Bond details, March 6, 2024 hma ngeia Election Commission hnena pe chhuak tura a tih SBI-in duh lova pawhsei a dil an duh lohna an lan tir.
He hunah hian MPYCC President Laltawnliana chuan thu sawiin India ram hi democracy a nihna angin party ten anmahni inenkawl nan leh ram aiawha thil an tih nan te, an campaign nan te sum an mamawh theuh a, membership fee an khawn te hi an sum hnar a ni ber thin tih a sawi.
BJP sorkarin company hovin direct-in party-ah sum an pe lo tih sawiin MPYCC President chuan, “Bank atangin ‘Electoral Bond’ an lei theih nan dan thar an siam a. He dan tharah hian BJP hi Electoral bond dawng hnem ber an ni a, party donation zaa 54 hi BJP dawn a ni,” tiin, an dan siam khan political party te pawisa dawn hi RTI hmangin a zawh theih lo va, mipuiin party sum dinhmun an hriat a tul lo an tih thu a sawi.
Supreme Court thutlukna tharah chuan SBI hian party hrang hrangte sum hmuh dan (donation) March 6, 2024 hmain Election Commission-ah a theh lut tur a nih thu sawiin Laltawnliana chuan, “Hei hian ram invenhimna lamah pawh nasa takin nghawng a nei dawn a ni,” a ti.
MPYCC president hian BJP sorkarin a thuneihna hmang sual tih sawiin, “SBI hotute chu party-te sum hmuh dan Election Commission-a an theh luh hun tur June 30, 2024 thlenga pawtsei turin an ngen a. SBI hotuten Supreme Court-ah hian an hun pawhsei an dil ta a ni. Hetiang a nih chuan MP inthlanpui zawhah daih SBI hotute hian SC-ah party-te donation hmuh dan hi an theh lut dawn tihna a ni a. BJP, khawvela party hausa ber-te sum hmuh dan hi MP inthlan hmain India ram mipui-te hian kan hre miah dawn lo tihna a ni,” a ti bawk.
Supreme Court-in Modi sorkar black money conversion scheme Electoral Bonds chu constitution kalh leh RTI kalh leh dan kalh tia sawia a lo hnawl tawh tih sawiin Laltawnliana chuan, “SBI pawh donors details March 6 a thehlut hman turin a lo tih tawh a. Hetih lai hian BJP te, hlawkna tel nasatna ber donors 44,434 automated data reilote chhung leka tihfel mai theih ni si thla li chhunga chinfel an ngiat hi a diklo,” tiin, Congress chuan tha an tih loh thu a sawi.