March 7, Ningani tlai khan Yupia, Arunachal Pradesh a Golden Jubilee Stadium-ah FIFA Santosh Trophy 2023-24 semi-final hmasa zawk khelh a ni a. Inkhel hmuhnawm takah Services lakah Mizoram an vanduai a, 2-1 in an tlawm. Mizoram hnehtu Services hian final-ah Manipur leh Goa te inkhela chak zawk zawk an hmachhawn zui leh ang.
Sawiselna nasa tak nena bul tan, huaisen taka inlan a, semi-final thleng ta hial Mizoram hian tan an hlawh viau a. Golden Jubilee Stadium-ah hmun hrang hranga awm Zofa thahnem tak an pungkhawm. |antu nei tha Mizoram hian goal hnih chhuah hmasa mah se hun tawp dawnah an khingpuite an nihrual teuh hle a. Hun tawp dawna lut Malsawmfela’n kohtlak a nihzia goal hmangin a lantir. Services lakah uiawm takin chak lo mah ila, kan tawih ral dawn lo, Mizote kan tho leh ang.
Khel tlang thang, fitness nei tha tak Services hian Mizoram lakah tha takin bul an tan a, an khingpui Mizoram an nawr nghal. Mizoram player te hmunawl pe duh lova, zim buai zung zung thin Services hian goal pawh an thun har lo. Minute 21-naah Keralite Rahul chuan box chhunga ball a dawn chu thlamuang takin a khalh kual. Mizo player pali hual vel kar atangin duh thalin a petchhuak thei a, si nghak Lalmuanawma dan rual lohin a pet goal a, hmahruaina goal a thun.
Goal thun hmasa zawka an tan vangin Services an ngampa leh zual a, inrintawkna sang tak nen an inlan chhunzawm. Mizoram hian nawr let thin mah se goal thun theihna hun tha an nei hlei thei lo. |uan rang zawk Services in an zimtawt zung zung a, an khingpuite an thlah zalen duh lo. Services hian hun tha an hmu ngun zawk a, uiawm takin an hun tha neih an hlah a, chawlhlawk hmain goal dang an thun belh thei tawh lo.
Chawlhlawk hnu lamah inkhel a hmuhnawm leh zual a, hun tawp dawn hnaihah goal hnih hmuh tur a awm. Goal thun mamawh Mizoram in player vannei an zawng a, an insiksawi nual. Bench atanga lut Lalruatpuia’n a pet goal teuh hle a, services si nghakin Ruatpuia pet tha tak hi a dang hman hlauh a, an team a chhanhim. Hun rei tak goal a luh belh theih loh hnuin Mizoram an vanduai nawn leh. Minute 82-naah si nghak Lalmuanawma a vanduai a, Services forward Vikas Thapa bum a tumna lamah a chesual. Vikas Thapa hian foul chungin Muanawma ball a chhuhsak a, ball um tlangin goal ruakah Services goal hnihna a thun. Chiang zawka enin Muanawma lakah Thapa hi a foul ngei niin a lang.
Goal hnih an chhuah vangin an dinhmun chhe viau mah se Khuangchera leh Taitesen-a te rilru pu, player huaisen Mizo val an zam lo. Hun tawp dawn hnaihah a pumrua a lo len tak vang leh a lo rih zual tak vanga sawisel hlawh hman tak Malsawmfela a tal na hle. Services-a Mizo player awmchhun Lalthangpuia leh Malsawmfela ten boruak an nei laih a, Thangpuia hnawhchhuah a ni. Thangpuia hnawhchhuah a nih vangin Services an buai zui hle. Malsawmfela chuan ama hlawhchhuah ngei free kick chu minute 90+3-ah mawi zetin a pet goal a, an si phurh sutin, Mizoram in beiseina thar an nei.
Mizoram hian an si phurh sut ngei tumin tan an khawh zui chiam a, Services an nawr bet tlat. Hun tawp dawn tepah Malsawmfela chuan tha zetin a tauh a, a tauh goal tawh emaw tih hnuah Services defender in a lo petchhuak leh hman tlat pek a, Services an him nawn leh. Mizoram hian goal thun belh leh se chuan extratime-ah an chak zui ngei a rinawm a, player te leh inkhel entute pawh an phur hman viau. Hun tlemte la awm chu goal dang luh belh lovin a tawp a, Mizoram chuan uiawm takin semi-final an paltlang zo ta lo a ni.
Santosh Trophy 2023-24 a Mizoram zin kawng chu a lo tawp ta a, football a Mizoram zin kawng erawh a intan thar leh dawn chauh thung. Football ngaina, hnam huaisen Mizote hi football ah kan tawih ral dawn lo, kan tho leh ngei ang. Hun harsa, hun hreawm kan tawh lai hi insawisel hun a ni lova, tha zawka thochhuak leh tura tanrual hun a ni e!!
Mizote tualchhung football a kan hniam laiin state dang an lo thang ve thung. Chu chu kan danglamna a ni.