Aizawl : Champhai District AIDS Prevention and Control Committee (DAP- CC) chu nimin khan an Chairman, Bawrhsap James Lalrinchhana hovin an thukhawm a. Champhai district chhunga private school-te tana adolescents edu- cation kalpui dan tur chungchang an ngaihtuah.
DAPCC Chairman, Bawrhsap ni bawk chuan chuan nakin lawka ram leh hnam innghahna la ni mai tur zirlaite hmakhawngaia chak zawka adolescents education kalpui a tul thu sawiin, ruihhlo hman khawlohna leh AIDS hluar zel tur do kawnga pawimawhte inhrilhhriatna hun neih tam deuh deuh a pawimawh thu a sawi a. Kalkhawmte chu sawrkarin programme tha tak tak a duan te tihlawhtling tura theihtawp chhuah zel turin a chah.
Champhai District-a Private Middle School, High School leh Higher Secondary School hrang hranga zirlaite tana adolescents education programme kalpui dan tur rel an rel a. HIV/AIDS hluar leh darh zel tur do bakah drugs hman khawlohna ven kawnga zirlaite zirtirna petu tur zirtirtute tana training pek hmasak dan tur te an sawiho.
DAPCU, DEO leh SDEO Office-te chu private school neih dan leh zirtirtu training tur te lo zirchianga a tul anga ruahmanna lo siam turin an ruat a. Training tur hian private school tin atangin zirtirtu 2 (mipa leh hmeichhia) te thlan tur niin, batch hniha training buatsaih ni se, an ti a. Training hun atan March ni 12 atanga 15, 2024 leh March 18 atanga 21, 2024 te an ruat bawk.
DAPCC meeting chuan adolescents education programme atana course content leh master trainer chungchang chu DIET Champhai kutah a dah a. Training tur hian Champhai District-a private middle school 43 atangin zirtirtu 86, high school 11 atangin zirtirtu 22, higher secondary school 5 atangin zirtirtu 10, avaiin private school 59 atanga zirtirtu 118 te chu adolescents education chu- ngchanga training buatsaiha tel tura ruahman a ni.
Khawpui pawn atangin school 36 (middle school 22, high school 10 leh higher secondary school 4) leh khawpui chhunga school 23 (middle school 10, high school 9 leh higher secondary school 4) te chu thlan an ni a. Zirtirtu training tura kohte hian an thawhna school theuha zirlai naupangte training an pe ve leh dawn a; training leh hmalak zui dante DAPCC in ngun takin a vil dawn a ni.