Aizawl : BJP Mizoram President Vanlalhmuaka’n an party BJP chu dawt hmanga beih tawk thin an nih thu a sawi.
Nimina BJP Mizoram pisa Mipui Run-a chhung inkhawmah Vanlalhmuaka chuan, BJP chu dawt hmanga beih tawk thin an nih thu sawiin, “BJP hian a tih theih loh tur emaw, ram mipuiin an thatpui loh tur thil emaw, mipui hmaah dawt tiam teuh a, sorkarna siam hnua insawi pial leh tumna ang chi hi kan tih ve dan a ni lo,” a ti.
Vanlalhmuaka chuan political mit dawihvaih chingte avang leh dawt hmanga vote zawnna avanga Mizoram mipuiin an tawrhna a nasa tawh tak zet tih a sawi a. Mizoram mipuite chu state dangte ruala PM Modi-a sorkar chak tak kaihruaina hnuaia hmasawnna kawnga ke an pen theih nan, state dang leh ram dangte dinhmun ngaihtuah chungin, central sorkara sum hmuh loh hlauh avanga Mizo hnam zia; huaisenna leh dikna an tihchhiat fo thin hi mawi taka a parchhuah lehna turin, Mizoram chu dah hmasa ber turin a chah.
BJP Mizoramin kum 2023 MLA inthlanpuiah khan Mizoram political party dang zawng zawngte manifesto aia chungnung, ‘Realistic Vision Document’ tiin an sawi hial manifesto an nei tih sawiin Vanlalhmuaka chuan, “Party dangte angin, manifesto hi BJP chuan kan inziah mawi siak ve lo va, kan inphuah that siakin, kan inziah that siak hek lo. Mizoramin hma a sawn theihna turin, kum 5 chhunga kan tih ngei ngei tur ziahna a bu a ni,” a ti.
BJP Mizoram President chuan, “Mahni kea kan ram leh hnam a din chhuah theihna tur lam hawiin kan hma lawka Lok Sabha General Election-2024 lo awm turah hian Pu Modi-a thawhpui theih tur BJP Lok Sabha MP i vote ang u, tiin BJP Mizoram Pradesh chuan sawmna kan siam a ni,” a ti bawk.