Lok Sabha inthlanpui atana inbuatsaihna kal mekah Lunglei District chhunga Assembly Level Master Trainers (ALMT) te tan nimin khan training buatsaih a ni a. DTO & DLAO, State Level Master Trainer Beithlotha Nohro chu resource person niin, training-ah hian ALMT ten an hriattur pawimawh leh an mawhphurhna hrang hrang te an zirho a ni.
Lok Sabha inthlanna muanawm leh felfai tak neih a nih theih nan training hrang hrang ngawr taka kal chhohpui mek a ni a. Nimin vek khan Khawzawl-ah Dy. Election Officer Lalfakzuala hovin Khawzawl district-a Telecom leh Internet Service Provider te an thukhawm a. Inthlan tluang taka neih a nih theih nan thawhhona tur hrang hrang te an sawiho.
Khawzawl Deputy District Election Officer, Addl DC ni bawk Lalfakzuala chuan Mobile Network leh Internet chak tha chu chanchin rang taka inhrilhhriatna, information pekna tangkai leh pawimawh ber a nih angin inthlan buatsaih nan a pawimawh tih a sawi a. Inthlan kalpui dan chu Election Commission of India hmunpui atanga hmuh theih turin internet hmanga thawn thlak thin a nih thu leh inthlan kaihhnawih thil hrang hrang te chu ENCORE Application hmanga upload thin a nih thu sawiin, hemi kawngah hian Service Provider te thawhpuina tha an hmuh a beisei thu leh khaihlak lova Network/Internet tha tak an pek theih a beisei thu a sawi.
He thutkhawmah hian Khawzawl district chhunga Telecom leh Internet Service Provider – Jio, Tawllawt, G-Net, Netsurf te an tel a ni.
Nimin vek khan Lawngtlai-ah pawh Addl. DC pisaah Lok Sabha inthlanna neih tura Candidate te campaign senso chhutna tura thil man bitukin Rate Fixation Committee an thukhawm a. DIPRO, Assitant Expenditure Observer, Accounting Team leh Political party hrang hrang aiawhte an tel.
He thutkhawmna ah hian Loud speaker, Banner, Poster, Hoardings, lirthei, thutthleng hawh man te, in luah man, Hall hawh leh Hotel thlen man te sawiho niin, ei tur chi hrang hrang man chhut dan tur an bituk a. Chanchinbu, Radio leh TV a political advertisement chhuah man te an bituk bawk.
Media Certification & Monitoring Committee thutkhawm zui nghalin, DIPRO Hmingthanzuala’n member-te hnenah zirtirna a pe a. Inthlan puan a nih hnuah Electronic media kaltlanga Political Advertisement tichhuak tur te chuan MCMC hnenah dilna an thehluh hmasak a tul thu leh uluk taka endik a nih hnuah chauh tih chhuah phal a nih thu a sawi.
Election Model Code of Conduct in a phut angin Political advertisement-ah te chi leh chi inkara inhuatna siam thei te, sakhuana lam sawichhiatna te, tharum thawh tura incho chhuahna thu te leh thubelhchiandawllo hmanga inpuhtawnna te chu chhuah phal a nih loh thu DIPRO chuan a sawi bawk.
Nimin vek khan Saitual-ah pawh District Election Officer Dr. Lalngura Tlau hovin, Rate Chart chungchangah meeting neih a ni a, kum 2023-a MLA inthlana rate chart (thil man bithliahna) te chu ennawnin, belh ngai te belhin, siamthat hret ngai lai te an siamtha bawk a ni.