Aizawl : MNF Adviser H Rammawi chuan MNF party chu a thochhuak leh ngei dawn tih a sawi.
Nimina Mizo Hnam Run-a chhung inkhawmah MNF Adviser H Rammawi chuan, MNF-ah chuan kiltinah senior ten an kaihza an veng dawn tih sawiin, “MNF hi a thochhuak leh ngei ngei dawn a, a bikin ram leh hnam humhalhna lakah hian Pathian hi a hnungtawlh dawn lo, kan inthlan leh hunah chuan MNF hi kan sorkar leh dawn, Zoram mipui ngaihdan inleh phut hun hi a thleng leh dawn,” tiin, party mite chu tan la sauh sauh turin a chah.
Budget-a an dah SEDP Rs vbc 300 an sem hman loh chhan sawiin H Rammawi chuan, “Nikum hmasa khan planning in bugdet ah an allocate a, village level leh district level ah a thangrei em em a, a dawngtu chhungkuaah a dawngtu tur boral leh nupa inthen avanga siamrem tur tam tak alo awm bawk nen, September 2023 khan 1st & 2nd Phase 2nd installment hnawhluh kan tum a, a vawihnihna tur an rawn tih mek laiin election min puan hnan ta a ni. Ongoing a nih vangin sem chhunzawm tur a ni a, Rs vbc 150 dawngtu tur kan thlang hman a, planning-ah expenditure sanction kan dil hmanlo a, chu chu ZPM sorkarin tuna an rochun tak hi a nim” a ti.
H. Rammawi chuan, Healthcare hi MNF tihchhuah a nih thu sawiin, “Budget atanga tih zel dawn chuan a hautak a, India ram state tam takin an tih theih loh a ni. Chuvangin kan CM khan tih ngei tha a ti bawk nen, Asian Develpoment Bank lamah kan ngen ta a, Finance Minister-ah min thawn sak a, clearance min pek hnuah Bank lam procedure angin kal a ngai leh a, agreement an sign tawh hnuah Rs vbc 1000 an nei dawn tihna a ni,” tiin, ZPM sorkar chu an vannei dawn hle tih a sawi.