Inrinni zinga NBA regular season khelh ah Dallas Mvericks chuan an khingpui Detroit Pistons an hneh. Pistons laka an chak tum hian Mavericks player pawimawh Luka Doncic chuan NBA record thar a siam. Inrinni zinga inkhel dangah champion lai Denver Nuggets in hnehna an chang ve bawk.
Detroit Pistons lakah point 142-124 a Dallas Mavericks in hnehna an chan tum hian Mavericks player pawimawh Luka Doncic chuan point 39 a thawkchhuak a, ball sawhlet vawt 10 a dawn tlin bakah assist vawi 10 a nei tling bawk a, triple-double a puitlin. Doncic hian season kal mekah a zawnin point 30 chin vawi ruk a thawkchhuak zawn a, triple-double a puitlin zawn bawk a. NBA-ah a zawna vawi ruk point 30 chin thawkchhuak a, triple-double puitlin vek bawk awmchhun a ni a, NBA-a record thar duhawm tak a siam. Doncic hian kum 2017-ah Russell Westbrook record siam a khum a. Hei bakah hian NBA-ah a zawna point 35 chin a thawhchhuah zawn rei lama a mimal record a tihzauh belh bawk.
Luka Doncic lansarhna inkhelah hian Pistons leh Mavericks te hi quarter thumah an inbeitawk viau a. Quarter thumnaah Mavericks an chungnung ta hret thung a, hei hi an inkar tizau zualtu a ni. Quarter khatnaah Mavericks hi point hnih chauhin an chungnung a, quarter hnihnaah point hnih bawkin an chungnung zui leh a, point li a hmahruai chungin chawlhlawk an hmang.
Chawlhlawk hnu lamah Mavericks an khel tha chhunzawm a, quarter thumnaah point 12 ngawtin an chungnung a, quarter hnuhnung berah point hniha an chungnung zui leh bawk vangin Mavericks hian an khingpui Pistons lakah point 16 in hnehna an chang zui ta a ni.
Inrinni zinga inkhel dangah champion lai Denver Nuggets chuan Utah Jazz lakah point 21 in hnehna an chang. Nuggets hian chawlhlawk hmain an khel tha zual viau a, point 34 ngawtin hma an hruai a. Hei hi NBA chanchinah chawlhlawk hmaa hma an hruai tamna ber a ni nghe nghe. Chawlhlawk hnu lamah Jazz khel tha hret mah se point 142-141 in Nuggets lakah an tlawm zui ta tho a ni. Jazz laka an chak tum hian Nuggets tan Jamal Murray chuan point 37 a thawkchhuak a. Most Valuable Player tum hnih lo ni tawh Nikola Jokic chuan point 26 a thawkchhuak ve bawk.
Inrinni zinga inkhel dangah Golden State Warriors an tlawm leh a, San Antonio an hneh zo lo.