Thawhtan zan khan Mizoram Super League (MSL) 9 final thawhkhatna khelh a ni a, Zarkawt BCA in hnehna an chang a, champion an hnaih.
Season kal mekah tlawm la nei lo Zarkawt BCA in champion lai Khatla TBL lakah bul an tan tha a, quarter khatnaah point 13 zetin an chungnung nghal. Quarter hnihnaah TBL khel tha hret mah se BCA hi point ngain an chungnung zui leh tho a, point 18 a hmahruai chungin chawlhlawk an hmang.
Inkhel a rei a, TBL an khel tha telh telh. Quarter thumnaah point hniha chungnungin an inkar an tizim hret a. Quarter hnuhnung berah point khatin chungnung zui leh mah se point 15 laiin an elpui lian BCA an umphak lova, final thawhkhatnaah point 95-80 in BCA an chak phawt.
Final thawhkhatnaah hian Zarkawt BCA player thar Amritpal Singh a khel tha nghal hle a, TBL lakah point 25 a thawkchhuak a, final thawhkhatnaah point thawkchhuak hnem ber a ni. BCA tan hian Lalrina Renthleiin point 17 a thawkchhuak a, Zonunsanga leh Lalnunpuia Renthlei ten point 16 ve ve an thawkchhuak bawk. TBL tana point thawkchhuak hnem ber Joshua Aaron Keys chuan point 23 a thawkchhuak.
MSL 9 final thawhhnihna hi zanin dar 8:00 hian R, Dengthuama Hall, Mualpui-ah khelh a ni dawn a, champion thar ni turin BCA in chak an mamawh. TBL leh BCA te hi MSL 8 final-ah an inhmachhawn a, vawi khat ve ve an chak hnuin game thumna inkhel hmuhnawm takah Khatla TBL in hnehna an chang a, BCA lak atangin champion trophy an la. Season liam taa an trophy hloh tak la let leh turin Zarkawt BCA in rin an kai hle a, zanin hian champion thar an awm mai a rinawm. TBL tan an trophy kawl mek humhim thei turin season kal mekah vawi hnih an hneh loh tawh Zarkawt BCA an hneh zawn a ngai dawn.