Finance changtu, chief minister Lalduhoma’n sorkar hmasa in Covid-19 hri leng avanga central atanga sum a hmuh tura beisei a hmuh kim loh zat chu cheng vaibelchhe 2370.80 a nih thu house a hrilh.
Nimin Assembly session-ah MNF member Robert Romawia Royte zawhna chhangin Finance minister chuan financial year hrang hranga sum a dawn tur ang a dawn tak loh zat sawiin, 2019-20 chhungin Share of Taxes ah cheng vaibelchhe 867.39 a dawn loh thute, 2020-21 chhungin Share of Taxes ah cheng vaibelchhe 957.41 leh 15th Finance Commission Special Grants-ah cheng vaibelchhe 546 a dawn loh thu a sawi.
Covid hri leng avanga Mizoram-in Central sorkar tanpuina an dawn zat chu cheng vaibelchhe 90.63 a nih thu sawiin, heng bakah hian For Management and Control of Covid hnuaiah NHM atangin Grant engemaw zat a dawng a, CSR hnuaiah sumfai leh bungrua te a dawn bakah Finance Department-in a hriatpui loh engemaw zat dawn a nei tih a sawi bawk.
Finance minister-in zawhna a chhan zawh hian MNF Member Robert-a chuan zawh belhin, Finance minister chhanna leh RTI-a zawhna chhanna nen a in an loh thu sawiin, RTI hmanga zawhna finance department-in an chhannaah sum hmuh loh chu cheng nuai sang 2632.58 tih a nih thute, sum hmuh loh belh khawm a in an lohna chu cheng vaibelchhe 100 bi a nih thu leh hetianga chhanna in ang lo awm chu pawi a tih thu a sawi.
Chief minister Duha chuan RTI zawhna chhanna pek hun chu August 2022 a nih thu leh khatih hunlai figure an neih pek a ni thu a sawi a, tuna a chhanna erawh accountant general atanga final figure an dawn a n ih thu a sawi.
Duhoma chuan sorkar kaltaah khan Covid-19 hri leng avanga sum dawn a tam hle chungin sorkarin a ngaihsak tawk lo tih sawi zuiin, CM relief fund ah te pawh sum a lut hnem a, NHM hnuaiah pawh rawn kal a thahnem hle a, hospital sakna turte a awm a, hmanraw leina, laboratory dinna tur te pawh a awm teuh a, chutihlaiin khatihlaia Health minister erawhin a hriatpui lo a, amahin department hotute a zawh kualnaah erawh bawhzui mumal loa fund dawnte a lo awm mai mai thu a hmu chhuak tih a sawi.
Covid-19 avanga central atanga tanpui, state sorkar tum ve tur awm loa 100% funding kha a lawmawm teh luh nen khan khatihlai sorkar erawhin a tuipui vak lo tih sawiin, RTPCR khawl pek an tumte pawh an dawng duh lo a, pawisa kha an in daih viau a nih dawn hi kan ti phah, a ti bawk.