Transport minister Vanlalhlana’n district pathum – Khawzawl, Hnahthial leh Saitual Transport Office-a thawk tur lak a ni dawn tih a sawi.
Ninim assembly session-ah ZPM Member Pu W. Chhuanawma’n Khawzawl District-ah Transport Office dah tumna a awm em tih a zawhna chu chhangin, Khawzawlah hian Transport Office dah tum a ni a, Khawzawl bakah Hnathial leh Saitual district-a thawktu tur lak phalna an hmu a, tunah hian hnalak kalpui a ni dawn tih a sawi.
District pathuma thawk tu tur an lak tur te chu – motor vehilce inspector 3, LDC pathum, enforcement sub inspector 6 leh group D staff pathum te an nih thu a sawi a,”Staff te kan lak fel a, building te an neih chuan district pathumah hian transport office chu an kalpui thei mai dawn,” a ti.
Transport minister chuan, bungraw phur lirtheite phurh rih zawng endikna weighbridge chu Vairengteah pakhat a awm a, Champhai, Kanhmun leh Phunchawngah te bun turin hma an lak leh mek thu a sawi.
Two wheeler taxi permit pek chhuah tumna a awm leh em tih zawhna pawh chhangin,”Permit pek chungchang ah chuan State Transport Authority kan nei a, pek belh a tul leh tul loh te ngun takin an ngaihtuah anga, tuna pek chhuah chin hian mipui mamawh a phuruk zo em tih te a ngaihtuah anga, STA thurawn chu kan kal dan tur a ni ang,” a ti.